Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
عمرنا ما كنا لبعضنا
Saida Jaafer - سيدة جعفرو فاللخر نرجع منين بديت
منين بديت معاك
منين بدينا آني وياك
نرجع نعرف ناس و نحكي مع ناس
اما فيسع نتعب
نتعب نعاود نفسرلهم شبيني
و شبي مخي مشوشط اغلب وقتو
و شبي دقات قلبي خارجة على برا مسموعة موجوعة
تتسمع تنهيدتي ملكوعة
علاش يلزم نعاود نمر بهذا الكل
علاش لازم نعاود نعرف حد
منحبش
منحبش نرجع نعرف بروحي
منحبش نرجع نقوللهم اش نحب و اش منحبش
منحبش نرجع نخرنن و ميسمعونيش كيفك
منحبش نرجع نحكي و ميفهمونيش
علاش لازم نعرف حد غيرك
وقت انت كنت تنجم تكون وحدك و ما فماش غيرك
وقت انت كنت تنجم تقعد و ما تمشيش
وقت انت كنت تنجم تكون وحدك معايا، و ليا و بيا و فيا
علاش لازم نرجع نعرف و نتعرف و بروحي نعرف
وقت انت اللي منحب نعرف حد غيرو
وقت انت اللي يعرفني و نعرفو
نعرف غناياتو اللي تشطحو
نعرف الناس اللي تغششو، نعرف البلايص اللي تحزنو
نعرف البعد اللي يبردو
نعرف نبرة بكاه و صوت شكاه
نعرف الماكلة اللي تفرحو
و الكادوات اللي تعبي عينيه دموع
نعرف الحروف اللي تحير قلبو و تخليه يحن
و نعرفو، و نعرفك
و نعرفك اكثر منك
غير انت مش فايق
غير انت ما تعرفنيش حبيتك
غير انت شايف و حاسس اما عامل مش فاهم حاجة
منحبش نخرج مع حد نتعشى
منحب نشد يدين حد و نتمشى
نحب نشد نقعد عالرمل معاك، مقابلين البحر الزوز
و الريح تطير في شعري و شعرك اللي ولاو محسوب فرد طول تو..
نحب تهزني لبلايصك اللي ميعرفها حد غيرك
و تعرفني عليها
نحب تدخلني في عوالمك و تغرقني فيها
نحب تعلمني نعزف على اوتارك و نتعلم نحبك كيما تحب
و نعلمك تفهم الخرم اللي عايش فيا، و كومام تحبني
نحبك تستعرف اللي احنا اكثر زوز فهمنا بعضنا
غير عمرنا ما كنا لبعضنا
و يمكن عمرنا لا باش نكونو..
سيدة جعفر
Website Design Brisbane
Tags: