أما كانك بش تقراني
افهمني ومتسمعنيش
أسمعني ومتسألنيش
إسألني ومتجاوبنيش

خاطر بالحق زايد الحديث
مع اللي يكلمك وما يفهمكش
يفهمك وما يكلمكش

يمسك وما يحسكش
يحسك وما يمسكش

يغزرلك وما يشوفكش
يصورك وما يلونكش

يلحنك وما يغنيكش
يسقيك وما يرويكش

ترصيلك تذبل وتموت
تتدفن
تسكت وتنقص في الصوت

خاطر زايد الحديث مع اللي ينسى
وأول ما يرى دموعك يتكونسى

يتذكر اللي غدوة جاي بش يهزك لبعيد
وقتها الكلام والحديث عمرو بالقلب ما يفيد

زايد الحديث مع اللي يمثل و يتمسرح
ويتخيلك كي يسرح

يسرح في تفاصيلك وكلامك المغطس في الدم
وجرحك اللي عمرو ما يتلم
تي تلم
واسكت!

خاطر زايد الحديث
مع اللي يدغرك وما يداويكش
يفرتك وما يلمكش
يلمك وما يلقى منين يبداك
خاطرك
ماتتلمش
ما تموتش
ما تحياش
ما تذبلش ما تترواش ما تتلونش ما تتمسش ما تتحسش...

خاطرك ما تتفهمش...

وأذاكا علاه زايد الحديث.