من تبسيمتك ماتحرمنيش ... من تذبيلة عينك ماتنسينيش... من لمسة ايدك وعطرك ماتعاقبنيش ... من صدرك الحنين ماتبعدنيش

عويناتك الشهل عسل يقطر ...ريحتك مسك وعنبر... ضحتك ذهب معير... كي نراك فرحتي تدوم وتزهالي ليام... يا أحلى مالنجوم وحورية

الأحلام ... وردة مفتحة في عروش قلبي... نسقيك بعروقي ودمي ... نبوسك ليل ونهار ... نجيك نجري ملهوفة كيما الصغار ... كي تتغشش دمعتي تسيل ... نذبل وهموم الدنيا نشيل ... نتعذب ونذوق الويل .... أما نبقى ندعي للي مينام الليل ... نحبك يا ورد وياسمين ...تفوحلي حياتي وتعدي معايا كل لحظاتي تنسيني وجيعتي وآهاتي ... كي نرا لمعة عينيك وحمورية خديك و رعشة ايديك نجنح ونطير ونبقى في عينك ولدك الصغير... احميني عندك

علاه ماتفهمنيش..  علاه ماتحبنيش ... بلا بيك منجمش نعيش ... انت ليا وانا ليك ... انت عينيا وانا عينيك ... انت شطري وانا شطرك .. انا نورك وانت شمسي انا ظلك وانت شجرتي انا ريحتك وانت عطري انا زهرتك وانت وردتي انا نجمتك وانت سماي ... تدور دنيا الكل وترجع في حضني وحذاي ... انا مرايتك نحبك وانت شايخة فرحانة وانت حايرة سرحانة وانت دايخة تاعبة فاشلة فادة متيقرة راقدة فايقة سهرانة .... نحبك كي تقوم مالنوم شعرك مشعشط مايل كحلك سايل

وجهك تاعب ودبشك مفرعس ... نحبك وانت لابسة مقدية ماشية في خرجة ولا لسهرية ... نحبك وانت تبكي خدودك منفخة وخشمك احمر ودموعك تقطر ... نحبك وانت متغششة وتصيح معنك وين يدور الريح ... نحبك اقراها ثبت فاها افهمها تمعنها حس باها ومبعد حبها وخباها ...

نحبك... علاه تجري بش ترضي لخرين وانا قدامك حزين قزين...حبيبك مشا ... صاحبك عطاك بالقفا ... دارت بيك الدنيا وصادك العما .. انا عكازك اللي بش تلقاه يخرجك للنور والضياء

متجرحنيش ..متعبنيش .. عنقني مسني الصقني راني روحك ... روحك اللي بلا بيك متسواش وانت بال بيها تموت وتفنا ومتحياش ... روحك جوهرتك صندوق اسرارك بلادك صاحبك وصاحبتك امك بوك خوك واختك
خبيني ومتضيعنيش انا كنزك وبيك نعيش

خلينا نحبو بعضنا ونواجهو الدنيا ومنستحقوش للي يسوا وميسواش خاطرني بلا بيك منجيش ...