يا وليدي الدنيا غدارة ... نكارت عشرة و حقارة .....

أخر كلمة من أمي نسمعها .... قبل منبوسها من جبينها و نودعها ....

خترت طريقي و لشقف مشيت ..... عارف روحي يا حي يا ميت .... يا نوصل للي تمنيت .... يا راني بموتي رضيت ..وطريق الرجعة ما حبيت ....... ودعت أمي ووصايتها منسيت ... ماشي و مش عارف مفتاح حياتي لقيت ؟؟

... تنجموا تلوموني علي طريقي لخترتوا ... أما حد ميرجعني علي مستقبلي لرسمتوا ......

علاش مخممتوش فيا وقت خنتوا و غدرتوا .... وقت روحي عطيتكم و قلبي ما صنتوا .... وقت الراجل حقرتوا ....  وقت طاحت بيا كلكم نكرتوا ......  ؟؟ ....

ملي ولدت عانيت ...... عذاب الدنيا الكل ريت ...... ملي صغير للفساد مشيت.... تبعت الركشة في الحومة و كلام أمي نسيت ..... الحكاية الكل بسيقاروا بديت ... واحد ورا واحد في عالم أخر روحي لقيت .... من قرايتي هربت و خليت .... كبرت في شوارع الحومة وين الرجلة قريت .... بين كلمة و ضحكة علي طريق الحق بعدت و خليت ...

الدنيا.. برشا عباد وصفوها ... فما لغنوا عليها و عابوها ... و فما لفرحوا بيها و شكروها .... الدنيا لغز صعيب بش نحلوها .... كي لكرهها كي الي حبوها .... تبكينا و منجموا نبكوها ..... فما لفزدوا فيها و ضلموها و فما لتعبوا و شقيوا و ما سبوها.... فما لصبروا و للعالي شكوها و فما لمقدروا ختاروا يمشوا يخلوها .....  الدنيا حكاية كبيرة صعيب نحكوها..... هي لبسمتي سرقتها  و ضحكتي هزتها ..... هي لفرحتي من قلبي شالتها .... تعبتني و مقترت نواكبها ... ملي ولدت بكيتي ستحلتها و وجيعتي حبتها .... حبيت طفلة قلت الدنيا ليا عوضتها ..... هي لحياتي ملكتها .... حبيتها و قلبي عطيتها ...... صنتها و دمعة علي خدها مرضيتها .... نتمني راني في حضني داريتها .... بين ضلوعي خبيتها ... وبين لعباد كان هي لريتها ... صوت ضحكتها يرسمو ..........قلت هذي حلالي...ﻷحلامي معاها بنيتها ..... أما كان ترجع بيا الدنيا راني من مخي محيتها .....

علاش لغالي ديما يجرحنا ... علاش لنحبوه هو ليوجعنا ..... علاش لنقولوا هذا دوانا يكون مرضنا ...

ضعت و بين الشوارع مشيت ..... الناس هايمة سارحة ريت ...الي ناجح و بديبوماتوا شاد الحيط ..... و الي يخدم حامل الذل و التمرميد .... عطيني الحل ..... راني فديت ..... ميلومني حد خاتر تلزيت ....  تلزيت نخرج من بلادي لفيها تربيت .... تلزيت نمشي وين أمي خليت .... هذا الحل للقيت ... هذا القرار لخذيت .... مغير متنصحني .. عارف... روحي للموت رميت .... نحاول خاتر عمري ما الذل رضيت