يا وليدي الدنيا غدارة ... نكارت عشرة و حقارة .....

أخر كلمة من أمي نسمعها .... قبل منبوسها من جبينها و نودعها ....

خترت طريقي و لشقف مشيت ..... عارف روحي يا حي يا ميت .... يا نوصل للي تمنيت .... يا راني بموتي رضيت ..وطريق الرجعة ما حبيت ....... ودعت أمي ووصايتها منسيت ... ماشي و مش عارف مفتاح حياتي لقيت ؟؟

... تنجموا تلوموني علي طريقي لخترتوا ... أما حد ميرجعني علي مستقبلي لرسمتوا ......

حكايتي مش عارفا نكتبها ... وجيعتي من قلبي مش منجمة نخرجها ..... جروح روحي كان مولايا ليعرفها ..... بدموع العنين في صلاتي نخففها ..... دموع قهرة علي الخدود تحرقها .... داوي الجروح تنظفها...وجيعة الكلمات متقدر توصفها ... يا حسرة علي الصغيرة الدنيا قتلتها .... بدمعة  و ضحكة حضرت جنازتها..... ويني للبارح ترسم علي ورقتها ... سرحت و الدنيا تخيلتها ... رسمت وردة شجرة وكل عايلتها .... خزرت و البسمة ماليا شفتها ... في هاك الرسمة الدنيا لخصتها ..... ويني ليوم ... ويني برائتها ..ويني ضحكتها ويني عفوتها و الدنيا لعمرها محسبتها .....

رجعت سنين بذاكرتها .... تفكرت الصاحبة لخانتها.... لحسبتها كي أختها و حبتها ..... دخلتها لحياتها ومن روحها عطتها  .... لوقفة معاها في وجيعتها ..... مارات بالعشرة و غدرتها.... هبطت دمعتها ... علي خدها حرقتها ..... الدنيا قهرتها ... سرقت منها فرحتها ..... وينوا الصدر لحنين لياخذ و جيعتها و يني لأم لوقت حاجتها مشت و خلتها ..... شدت قلبها و كتمت بكيتها .... وجيعتها لغير ربي مورتها ..... معندها غير مولاها ليه شكات ....هزت يديها لربي و دعات .... معادش منجمة .... صاحت و بكات..... و الوجيعة زادت موفات .... أه يا ربي الدنيا فرحتي  خذات ....