Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
تي اغزرلي
Saida Jaafer - سيدة جعفرو في كل وجعة قلب ولا قبضة ولا وجيعة
يتسببلي فيها حد ماللي قراب ليا
و من غير ما نقول شكون، و انتي تعرف
نتمنى كان جيت انتي ليا
كان جيت اني تابعتك و انتي تابعني و نعيش فيك و تعيش فيا
نتمنى كان جيت انجم نتكى على قلبك
نعنقو، و نعمل معاك كل ما قلبي شاهي، منك و معاك و بيك
نتمنى كان جيت عليك مسمية
نخرجو عقاب كل سهرية
بالدرڨة، بالسرقة، على كل عين حسودية
نتمنى كان جيت في حياتي
ضو، يشعل و يضويلي قدامي كل ثنياتي
نتمنى كان جيت نفس، نجبدو كل ما تضيق بيا و عليا
و كل ما ننسى روحي اني وين و شكون و شنية
ساعات نتعب مالتمني
نقول خلي نرقد ..
غادي نحلم بيك كي كل ليلة و امسية
غادي نكون ليك و تكون ليا
و غير لبعضنا منڨدوش نكونو
ف منامي برك، انجم نجيك، و نشكيك
نعيط و نصيح عليك، علاه خليتني وحدي و مشيت
علاه ما خرجتنيش ماللي اني فيه
تي ماك تعرفني سنين و اني نعاني هنا، تي قد ما حكيتلك عليه
زعمة؟ ياخي نسيت قداه بتت نبكي منو، قتلك راهو عينيه فيا ما يهزهاش
قتلك راو غير طفلة قراية و عاقلة فيا، الطفلة الأخرى اللي كبرت ما يشوفهاش
قتلك راو ميعرفش يحب، راو يعرف كان هات جيب، وينك لتو
شبيك لابسة هكا
شبي مغطية ماللوطة بركا
لا نهار قال نهدي بنتي خاتم ولا شركة تتفكرها بيا كي نتفارقو
لا نهار قال بنيتي لبسة العيد كس اندادها، تو تقعد في قلبها عقدة
تو تكبر و تلقى روحها تحس بحاجتها لأنها تتكى على قلب آخر غير قلب بوها
و تحب تعنق كتف آخر غير كتف بوها
لا نهار قال تو تولي فيسع ما تتعلق بأقل حد
تو تبات الليالي تكتب عليه، و هو راقد لا يعرفها لا عمرو شافها
بالك بنتي تكبر و هي ناقصة حب
بالك تولي تكتب و تقرى كتب
تلوج عاللي باش يحبها و ما تلقاه
ما زلت نتمنى، تجي نهار
تتقابل عينينا
وجهي يحمار
قلبي يدق لين معاش نحس بسقيا هازتني
و الدنيا الدايرة بيا مش رافعتني
فقدت الأمل فيه و معاد نستنى منو في شي
اما مزلت عاقدة فيك النوارة
نقول تو يجيني و يطلعني مالدنيا هاذيا
يهزني حذاه، وين ننسى كل ما بيا
نعيش معاه و بيه و ليه و فيه
اي و شبيه؟
هاني باش نرقد بكري الليلة،
نربح بزايد ساعة باش نراك فيهم في منامي
نعنقك كيما نحب، نبوسك كيما نشتهى
نبكيلك و نحكيلك و نشكيلك
و نعملهم الكل
و انتي تسمع و مني ما تمل
هاي تجي تحل؟
الباب يدق، حلهولي
نحب نجي نشوفك فالمنام
و نحملك و نشمك
و نحشم نخبي راسي في صدرك
و تدور بينا اطيار حمام
و فالليل تعنقنا النجوم
و نبقاو نحسبو فيهم
و تسمي وحدة باسمي
و تقلي هاكي ليك
تي شبيك؟
حاشمة تقول عليك اول مرة تتحب فيها
تي اغزرلي متغزرش للسماء
راني نغير عليك حتى منها..
نحبك فيبالك..؟
سيدة جعفر
Website Design Brisbane
Tags: