بايعتكم و بايعة كرهكم و حسدكم، بايعتكم و رامية ورايا قلة خيركم، بايعتكم و بايعة قلوبكم الخايبة و نفوسكم الموحشة

بايعتكم و بايعة دنيتكم الفانية ألي لا فيها لا مطعم لا روح،بايعتكم و عايشة زماني البنين بالدوني و ألي عالنفس وقعو حنين،

بايعتكم و شارية نفس حر يرشم أيام الأسياد،لاكم ركوبي و لاني ركوبكم،ميزاني عالي على تهترياتكم و جمودكم

أنا اللي ناخو نفس طويل من نسمة البحر و نصدم مانخاف أرياح، أنا اللي نعدي مرارة الايام بزهو و طرب الاحلام،

أنتوما أيامكم الكل رديتوها مر في مر و ماكم من اهل الأحلام!

أنا اللي نخبي و ندس الوجيعة في الاكفان و نحل على وسع يديا الشبابك و البيبان بش الضوء يملي الدار و نحس بالأمان،

أنتوما تتجراو و تتسابقو شكون اللي يقول عندو هم أكبر من الأخر! شكون اللي مريض أكثر !شكون اللي حزين اكثر !كاينها الشكوى لبعضكم بش تخفف و الا تنقص!

أنا ....غناية تزيهيني تعملي كيف و تعبيني و أنتوما  فن العالم الكل مايزيد قشة فيكم،

انا حتى كي نبدى مانملك حتى مليم مايعنيني،أنتوما كي تخلطو للمليم تحلو جيوبكم و افاكم للألف،

أنا ننسى ألي عملي و ڨدلي و نجريلو كي يقصدني والا يبيبيلي ،أنتوما تبيعو خوكم امكم و بوكم و تقولو و الجاه خاطينا  راهم غدروا بينا ،روحي منكم عليلة ياللي تحكيو بالعشرة و في لحظة الخوف و المحنة أخطى راسي و اضرب ،بيني و بينكم ....برور بعدها بحور ،جبال تحدها وديان تشقها في ليل حالك ريم الغزلان ،بيني و بينكم ضحكة مالقلب و فرحة مايسعهاش درب،بيني و بينكم الكار و القيمة و بنة وجيعة المشوار،

بيني و بينكم حلمة طفلة صغيرة موشمة في البال حلمة ماتحدها أجال يمكن  يكتبلها تتعاش في الليل و الا في النهار لمفيد تنبض و تولي لها اوتار،القلوب مخازن و أنا اللي في مخزني على لساني لا نعرف تخبية لا كتمان ،نجري في حظوظ النسيان فماش ميحن عليا،نسيان الغدرة و الضربة اللي ترخ الظهر و ماتقسموش،نسيان الغربال اللي كي مال طيحكم منو وهزتكم الارياح لغير مكان، و دارت الأزمان و ماقعد في الواد كان حجرو المطبوع برجولية الوقفة و رزانة الأفعال مش وهم الكلام.

أي بايعتكم ! و شاريتو هو وحدو ...شطري اللي يفهمني على بعد أميال