Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

باش يسألوك : حبّيتها ؟

trahison-luiSaida Jaafer - سيدة جعفر

قوللهم الحقيقة جاوبهم ،قول كل شي احكيلهم عالشقيقة و الرقيقة قوللهم لا عمري لا حبيتها قوللهم كذبت و الحقيقة م عطيتها قوللهم شويتها. كويتها..

بكّيتها و كي جيت نطبها عميتها ربطتها بيا حبل و خنقتها بيه مبعد حليتو و على طول ايدي اليسار ،مش اليمين. .

رميتها! قوللهم للسما السابعة شيعتها عليتها، عليتها، عليتها و فلتت من بين يديا و ما شديتها قوللهم باتت تبكي مني باتت تترجى ربي نحبها و ما حبيتها خذيت منها و لا عمري عطيتها نهار جات وقفت قدامي عنقتني و ضحكتلي و يا ليتها !

وقتها اول مرة ضحكتها ريتها شديت يديها شميتها يديا ما بين خصلات شعرها عديتها و حنيت راسي على كتفها هموم دنيتي معاها نسيتها طيشتها فالبحر قدامنا، رميتها و بستها و عاودت قربتلها شميتها و ريحتها فيا داخلة، و داخلة نتفكرها نهار كامل قعدت في خشمي واحلة قوللهم قول،.

وقتها حبيتها وقتها حليت عينيا و ريتها وقتها حن قلبي، و حبيتها كي ملات دنيتي ضحك، كي خليتها تدخل فيا و ريتها تلونلي في دنيتي و تحبب فيا في كل شي و خليتها تحبني و تحببني و تاخذ مني النفس و من روحي عطيتها حيّاتني حيّيتها و حبّيتها. قوللهم، يا ناس راني حبيتها. و غيرها م حبيت.

سيدة جعفر

Saveباش يسألوك : حبّيتها ؟