Emna Frawes - آمنة فراوس

تشويت...خرجت نكركر في ساقيه تكركير...خلطت عليا تجري و جبدتني من يدي ...سمحني...سمحني كان قلقتك...حسيت روحي جرحتك و الا ...منعرفش شنوا الي عملت اما بلحق سمحني....حبيت....

بربي علاش باش نسامحك ...وفات لحكاية في البار...فهمنا بعضنا بالغالط مصار شي نواره....انت سمحني...انا منجمتش نكون بطلك...انا منعرفش نلعب دور الابطال...انا مجرد ريفي

بسيط...انا كنت عايش ...جيت انت بلبزطنتي...كالعاصفه تعديت بيا...

حسيت روحي نقول في برشا كلام ...و هي تسمع فيا و عينها حمرا كالدم...تلمع...مرغرغه...

قتلي ...بلحق سمحني ...متصورتش روحي عملت هذا الكل.

طبست علاها بوستها من خدها...هزيت روحي و مشيت...

البرد يضرب من كل جهة...شفايف يرعش...وصلت لدار بسرعة البرق...دخلت...لدار ...شعلت الاضواء الكل...حليت التلفزة بصوت عالي...شعلت ااريشو ...حليت الفريجدار...جبدت كعبه بيرا

طرشقتها....شربتها فرد جغمه...شطرها تبزع على حوايجي... رديتالنفس...تقرعت بصوت علي...حليت رديون قدامي ... يعديو غي غنايه منعرفهاش...دورت من بيت لبيت...لبست كبوطي...حطيت كسكات على راسي...لفيت كشكول على رقبتي و عوت خرجت...وصلت لباب البلاص...النهج خالي يجوجي...مفما كان انا و قطاطس الشارع...برد يجمد لعروق...
زوز قطاطس تيدفيو في بعضهم...يقصرو غي ليل ببرشا محبة ...تدحنس عليه و يدحنس علاها و تدحنس عليه يخزلها في عينها بتبهنيس...قعدت نتفرج علاهم...و على محبتهم لبعضهم...شبينا احنا مش هكا...ه الانسان قداش غريب عجيب...اناني ...مستغل...

وجعتني نواره

...شعلت سيقارونكذب و نسي...هزتني ساقيا في كل ثنيه و انا نخمم و رجع في المشاهد الكل و الحلمه الكبيره الي كنت نحلم فها....انا كل مني انا .... نبني و نعلي في قصر من الرمال...بنت بالمدينه مش ممكن تراني كان بطل من ورق...

تشعل فيا النار كل ثانيه...و انا نتفكر...خزرتها... في حركت شفايفها و هي تنطق في هك الجمله التعيسة...يداها وهي تحرك فها باش تقنعني بإقتراحها... ثنية تهزني وثنية تجيبني

سكرني كلامها...من غير شراب...احترت و احتار دليلي...يا ريتني...ما ريتك ...ما عرفتك في هاك ليلة