المْنامة #18

roman-emna-frawesEmna Frawes - آمنة فراوس


نحن هنا.وين سارح ؟

لا ...لا...معاك .

جهامه...اما العقل هايم...قلقت؟

هاني دخلتها بعضها.كيفاش قلقت يا نواره و انا عندي وأنا نستى فيه اللحظة.

والله؟

لكلام خارج من فمي من غير منحس.

تبسمت هي.وقتلي فرحت ياسر كيف ريتك في القهوة.حبيت اراك .منعرفش علاش هو لحقيقة نعرف.

تشجعت بارشا لخاطر ه اللقاء

قلبي دق ....دق ...بلشت فها عينيا

...تعرف الي انا عاملة سينما و الا لا؟

لا منعرفش. اي؟!!! Donc...

امممم منعرفش كان باش تعجبك الفكرة.

اما هي فكرة مهبولة ...

نحب نعملك فيلم.

نعم...شتحب تعملي ....ههههههه

عاود...

وطرشقت بضحك هاني نضحك هاني نضحك ...

شرقت ...عينا دمعت

وجهي باش يتفلق بسخانه.

و شي الضحكة محبتش تتنحى.

و هي ساكته كلمه لا .

تعملي  فيلم...تحكي بجدك .

و نرجع نضحك...

...سينيما و العاب فيلم مفهتش ساسو من راس و انا ضارب 4سوايع قدام لمرايه ....باش تقلي فيلم...

تفدلك انت اه ....براس امك قلي تفدلك....

خزتلها في عيناها لقيتها تخزلي

و تتبسم .

كنت متأكدة من ردت فعلك ....

قريتها في شخصيتك...زيد عادي متوقعة  ...باش يجيك

ه الاحساس...عندي فكرة فيلم قصير و من ليلة الي شفتك حسيتك الشخصيه الي الوج علاها...

انت ...الملامح الي نحبذها

لازم تكون انت بطلي...

معاك انت باش تبدى لحكايه

بك باش ننجح.

اعطيني فرصتي.

النص مميز.قصير مش طويل ...حكياتنا اليوميه.

حسيتها تحكي بجدها و الطفلة مازالت شاده صحيحة في الهدرة و بدى الدم يطلع الراسي....و كلامها معادش سامع و لا فاهم...

حسيتها تمنيكت عليا انا جيت معبي بحكاية جميله . جات هي و رمات كل شيء في قاع بير خاوي. و الصوره الجميلة ارى فيها لفعة بسبعة روس ...  مخي يهز و يجيب و المرا مزالت تحكي

على بطل الفيلم متاعها

يا ديني...!!! فار تجارب يعني باش تكمل بيا قرايتها.

عاداتها عليك بنت المدينه ياعتبرتك نموذج...حسيت بدنيا دارت دارت بيا سبع جبال و سبع بحور و هي مازالت تحكي و لا سكتت.

و انا ...لا فهمت لا طاير و لا ماشي...

نسمع فها تقلي علي يا علولو...اش قلت عاد. تحب نعطيكلتفكير

بهت في جراتها...يخي غبيه  الطفله!!! والا شباها...

تزلزلت تهزيت تحطيت...بيني و بين روحي و مانجمت نقلها حتى كلمه...

شدتني الغصة ... تمنيت تبلعني الارض...خاتر معرفتش شنوا نقلها .

وقفت هندمت روحي ...

وقفت

استويت سروالي...

شوفي بطل اخر من ورق يا انسة ...انا مش متع افلام.

هزيت روحي و خرجت.


آمنة فراوس

Saveالمْنامة #18