Emna Frawes - آمنة فراوس

وقفت شوية قدامي...

قبل ما تجبد كرسي و تقعد.. محلاها و مضخمها...مرا كاملة الانوثة ...شعرها مضفور على جنب... جبهة صغيرة... حاجب غليض... عوينات زادهم الكحل حلاوة... خشم كسمانة ... شفايف ماليانة و روج يدوخ علاهم... كشكول روز باقة بيه رقبتها... ڤاست كحلة قصيرة... مع سروالها الدجين أزرق...الي مبين إدحديحتها.كل ما فها رجعلي إحساس ليلة اليوم شوفتها أول ليلة... و هي تشطح على زوربا...و صوت ضحكتها إلتوا قاعد يتعاود.

- تي...ولد الباي... وين مشيت... ضاهري قصيت عليك ساعة الصفاء... مع روحك...

أبدا... مرحبا أقعد..

- شنوا حوالك؟ من ليلة السهرية ماعوتش شوفتك... سألت عليك دنيا برشا مرات ... قتلي تراك كان في الخدمة. المدة لخرة الكل...وين متخبي؟

هما زادة ملي نقلو وليت مراهمشي ديما...

وليت خدمة ...دار  ماعندي وين نمشي .

أنت جابد روحك...  مش ديما تظهر؟ما عندكشي أصحاب ؟

-عادي... لا برشة و لا شوية.

ما انت أش مخرجك في ه صباح مزلت السبعة ما جاتش؟

كل يوم نشرب قهوتي هوني تقريبا.

صحة والله( matinale)مالا... حتى أنا كيفك... نحب قهوة صباح بكري أما الحقيقة قليل نقعد هوني...

--مكاش  باش تشربني قهوة...

سمحني...سمحني ...شنوا قهوتك؟

- café crème  و pain chocolat

ضحكتْ... تدلل...

عيطت ل serveur ... طلبت قهوة نوارة...

شعلت سيڨارو.رجعت نترشف في قهوتي.

سكت... و سكتت... طاشت عينيا فيها... و هي تغطس فيpain chocolat  في القهوة...

هزت عينها... خزرتلي نص خزرة... تبسمت... فتراش معبي شفايفها..   

شبيك باهت؟

وطرشقتْ بضحك ... أول مرة تشوف حاجة هكا؟

و الا حاشم من الناس ؟

-- لا لا عادي ... خليك كيف ما أنت. على طبيعتك...

في واقع ، بهت في جرئتها في الماكلة هكاكة قدام الناس...  رميت عينيا بسرعة البرق على اليمين و اليسار  حد ما هو منتبهلنا...   

أنا هكا ...نعرف روحي بلبازة... شنوا عندك تعمل غدوة..

أنا؟

أي انت... مالآ شكون...فما فيلم غدوة... في سِنيما هبط جديد... فيلم تونسي تمشي ؟

نمشي... اما وقتاش؟

الستة قدام ABC....تفاهمنا ؟

.-هات نومروك...نكلمك كان باش نجي...

غدوة كيف تجي نعطيك-

متنساش... السته متع لعشية قدام السينما ... خلي نمشي توا... عيشك على القهوة... السينما على حسابي... هزت صاكها و مشات...

لا عرفت روحي... موافق و لا مش موافق... خططت قررت وحدها...

زعمة نمشي غدوة ؟

و كيف نمشي و منلقهاش؟ ربطتني بها توا.

ثورتنا توا هذي.  ؟

ياخي خايفة على نمروها ؟

قولش علينا ذراري صغار... ضربت يجي ساعتين في القهوة و انا مخي يهز و يجيب... لا فهمتها لا كيفاش جات و لا كيفاش مشات... شنوا الريح الي رمتهالي ؟

و حطتها قدامي...