الشابي يقول : "اذا الشعب يوما اراد الحياة فلا بد ان يستجيب القدر ...ولا بد لليل ان يجلي ولا بد للقيد ان ينكسر "

وانا نقول اذا الانسان حب الدنيا وقبلها لازم تتحلو الف البيبان المسكرة والمبلجة ...الانسان تخلق باش يعيش ويتأقلم مع كل شيئ مهما كانت الظروف ..يتعلم ..يتفنن ..يحلم ؛ يطيح ويقوم.. يتكسر ويتلم.. اما المفيد يبقى انسان ..هو صحيح الدنيا تبدلنا تخلينا شواطن والا ملايكة والا جثة تتحرك بلا روح ولا نفس ولا هدف ولا حلمة ولا تعنيقة ولا حبيب ولا غريب ..

لكن تخلي فينا جرح عميق ميبراش ..يبقى محلول وفي كل دمعة نتذكروه ونجبدو خبابلوا ..اما السؤال المطروح وقتاش باش نتبدلو لحاجة ماخير ؟ وقتاش باش نتعلمو نعيشو تحت الماء ونتنفسو الهواء ؟ وقتاش باش باش نتجردوا من كل سلبياتنا ونخلو كان الايجابيات والروح النظيفة ؟ كلها اسئلة تجول في خاطرنا وتعذب فينا وتهرب في نومنا ..

الحزن والكئابة مينفع لشيئ غير انو يهدنى ويمتص طاقتنا الكل ..يخلينى جهامة هارمة ..يخلينى شايحين نفتقروا لرواحنا ..لكن علاش نحزنوا ونحنا عندنا القوة باش نبدلوا الحزن لسعادة ؟ ونغيروا الضعف لقوة ؟ ونفسخو سنين عذاب والم ونرسموا مستقبل جديد والا انسان جديد ... يحب الدنيا ويقبلها بصعوباتها .. يتعلم معنى يحب ويتعلم القوةوالصلابة والاستقامة والاقدام والانتصار ..

كلها كلمات تنعوش قلوبنا المنسية الضلام..علاش منهدموش ومنتمردوش ومنعيشوش ؟ ..علاش خيرنا نعيشوا عبيد لكلام الناس والا الفيئة المعينة اذوكم الي قلوبهم مسوسة وعقولهم مشوشة..الي كلاو الماء والملح وباعد كلاو لحمنا وزادو فوقوا الملح وكبر الجرح...علاش نقعدوا عبد لافكارنا السلبية وشهواتنا الي تجرنا للهاوية وتعارض شرع الله..؟!

علاش منتحملوش المسؤلية ..نحتجو ونتموردو ونثروا على العقائد البالية والشعارات ..هو صحيح خلقنا لنعيش ..لكن العيشة المرمدة بلاش بيها !.. عيشة مكبلة باغلال حديد وسلاسل ! ..علاش منكسروش الماضي ونؤسسوا مستقبل جديد مختلف عما سبق ..نتحرروا من كل شيئ ونخرجوا الابداع الي فينا ..ويزي من كلمة تعبت وفديت وقلقت ..بعد التعب راحة وباعد البكاء سعادة وباعد الخصرة راحة وباعد الوجيعة فرحة ..