نكذب على روحي كان نقول اني متعبتش ومعييتش .. نكذب كان نقول اني منحبش نسلم توا ونوخر لتالي ..ياخي جربتوه شعور الضياع الي يتمكن بيك ويحتويك ..شعور غريب تحس انك تعيش نهار برك يتعاود ويتعاود ..نفس الوجوه ..نفس الحكايات ..نفس الكلام ..نفس الخزرة ..اما انا منيش متاع لبارح والا متاع غدوى ..ذواتنا تتبدل كل ساعة وعلمها ..مرة زاهية فرحانة ..ومرة مدمرة وتحب تموت ...مرة ساكتة وصابرة ومرة فادة وحزينة ..اما هذا التذبذب والاضطراب في شخصيتي كل يوم مجاورني ومحاذيني ..مستملك بيا ومستفرد بروحي يڨتل فيا بالعرڨ بالعرڨ ..

لمدة لخرى ذڨت الغدر ودخرة الخدمي الماضي بين الجوجي ذقت غدر الاصحاب ..وشفت ڨداش موجع انك لمدة هذي لكل والسنين والعشرة ومزالت متعرفش علي ڨلت عليه صديق فذ باش يوقف معاي في الشدائد الكل وباش يبجلني على الغير ..ياخي تكتشف انك ارخص من الرخص عندو ..

انا وبكامل الصفات الي نتميز بيها وصحيح تعرضت لاعنف اللحظات في الحياة واقصاه من حڨرة ومن تمنيك على شخصي ومن فقر ومن برشا حاجات تخلي الانسان محنط وعاجز ومجبس في بلاصة وحدة ..ڨداش كرهت العالم والمجتمع وكرهي ليه يقوى كل نهار نحل في عينيا ونتنفس هواهم المسخ ..الي يعج بكلو نفاق وترهدين وبرشا خور وتسكبين ...اما صحيح زادة ورغم ها الموجة الي طغت على صدري وحطت رحالها عليه منيش باش نهرب كيف العادةونختلي بنفسي لا ..وانما باش نواجه اكثر ومنيش مسلم توا ..لانو وقتي وفرصتي مزالت بين ايديا وماحنتش الساعة بعد...

اي انا الي يڨوم الصباح باش يواجه العالم ويواجه كلامهم المعسول الي يڨطر بالسم ..ونواجه عقليياتهم وعاداتهم البالية ..ورغم ها الوجيعة الي متمكنة بيا وملتبسة روحي الا اني منيش مسيب ومازلت نحاول اني نقدم خطيوة لڨدام ..خاطر الثنية مزالت بعيدة وحبلها الصبر لا حب الڨبر..حبلها جهاد موش سمع كلام لعباد ..حبلها القدرة موش الخور والغدرة ..

حبيت نقوللكم من جيهتي احلمو بالكبير ومتخلوش الحلمة تفوتكم .. اقبلو وتحررو من افكار لماضي ..نعرف صعيب ونعرف منجمتش اما حاول ..ميسالش تي شكون فينا فرحان وزاهي شكون فينا يضحك من قلبو شكون فينا مبكاش ومصاحش ومعيطش ..شكون فينا مذاقش المر والحرمان ..اما هذا لكل خليو كل شي على ربي وميسالش مارس حقك في البكاء والحزن اما متسلمش وسااامح خاتر الإنسان القوي الي يسامح روحو ويسامح الناس حتى كان ظلموه ؛ نحنا تخلقنا باش تكابدوا الدنيا ونصعوا الحلمة ونعملوا في البحر ثنية ونمشوا عليها ! ..

"كل يوم نادي يا حلمة متمشيش هايم في أتراب أجدادي تونسي ونحب نعيش إحملوا بالكبير وبالصبع الكبير شوط ..شوط ورجعها لبلاصتها ..خاتر ياسر عرفات قال الي يحلم متموتش وهو حي" !