ملي صغيرة وانا نحلم نكون طبيبة ! ونداوي كل مجروح وموجعة من هم الدنيا

نداوي الزوالي والمسكين والفقير كيفي ..خاترني كي نمرض ميداويني حد ! وحتى كيف نمشي نقلهم داووني راني تونسية يحقروني ونحس بوجيعة لداخل تشعل فيا ! ..

هذاك علاش واجهت القدر متاعي وتغلبت على الفقر ! وقلت "الفقر فقر العقول لا فقر الجيوب " وتحديت كل شي كنت نقوم على الفجاري ! نظف ونشعل النار مع امي باش نطيب الفطور معاها وباعد نمشي ! كان همي الوحيد اني ننجح ونمسح دمعة امي ونبنيلها دويرة تسكن فيها مع اخواتي !

حبيت نعيش كيف اصحابي الي يحكو قدامي ويفدلكو ونتشهى في انواع الماكلات ونتخيل فيهم قدامي ! نحب نذوق الطعام الي قعد ريحتو مسجون في مخي ! ..موجوعة برشا من هم الدنيا ! ومن صعوباتها وكرخت وجهها المسموم الي تضحكلي بيه ..وتعبت من زرارقها الي متبراش ..نحب نرتاح شويا ! نحب نشوف الرفاهية والراحة الي قريت عليها في المدرسة ! وعلمتهالي ستي ! ..نحب نشوف عالم اخر فيه نتحرر ونضخك ونلعب ونشيخ ومنتعبش ! نحب نشوف زين الدنيا وضوء الشمس والقمرة ! ..وفي نهار ممطر قوي امي قتلي متمشيش دنيا مبلولة توا تمرض قتلها لازمني نقرى ونواجه ونتغلب على روحي ونتحنل باش نوصل ونعليلك راسك يا امي ..بوستها من جبينها وهزيت محفظتي ومشيت اما ممرجعتش ! وخليت امي وحدها ..وعروستي زادة ...خليت دارنا الي حبيتها فارغة وخليت نقبة في قلب امي تبكي عليا ! خليت بابا وحدو واخواتي زادة ! وخليت حلمتي ! معلقة ! ومشنوقة ! ..

انا حبيت نبدل حياتي ورغم صغر سني واجهت وتعبت وعييت وتهتكت وتغدرت وتتظريت وبكيت وحسيت ..وعشت وعلى الجرح عفست ومشيت ! ..حزنت وكل يوم بكيت..حبيت نبدل من حياتي وسعيت خاتر " شرف الانسان في المحاولة "... انا من جيهتي نحب نقلك على لسان ها الرسالة حاول اكثر ودز الدنيا ..والكف الي ميقتلكش يقويك ! ميسالش احزن واتعس وفد واقلق وانعل القدر ياخي شكون فينا مرتاح ! شكون فينا عايش سعيد فرحان ! ..حقك انك تتعب وحقك تبكي وحقك تتهد اما قوم ! متقعدش في الظلمة ! خاترها متوالمش روحك الي تحملت الياسر ! ياخي انا باش تقعد ديما في ها الدنيا في لحظة تمشي ! واي وقت تتندقر وتقعد حديث ! هذاك علاش اتعب واسعى وكان ملقيتش حظك هنا تلقاه عند ربي ! متقولش ربي مسمعنيش وميحبنيش ! لا ربي يبتلي فيك ويختبر في صبرك ! حتى كان تعبت ومليت من الصبر زيد اصبر ! ..خاتر باش يستجيب ليك ! وباش يمسح عيونك من الدمعة وباش يجبرلك بخاطرك خاتر هو الحي القيوم الي ميموتش !

...ادعولي بالرحمة ..