نحبك ! ..

معنتها نحررك ..نزينك ..نحترمك ..نقدسك ..نبوس التربة الي تمشي فيها .. نخليك معاي ..نحسسك بالي انا نحبك .. نقلك كلام حلو فيه الحب .. نبعثلك ميساج آخر الليل نقلك فيه توحشتك..توحشت خيالك ..صوتك ..ريتحك ..ضحكتك ..خدودك ..كلامك ..وعياطك وحتى حزنك ودمعتك وصخطك ..وهبلاتك ورقصاتك تحت مطر الشتاء .. توحشت مزاجيتك وهزانك وتفضانك والطفلة الي داخلك.. توحشت نهزك للبحر ونقعدو نتكلمو ونخزروا لغروب الشمس ..توحشت هبلاتك وفرحتك كي تلقى كدس كتب ..وتعنيقتك لبنية صغيرة متعدية في الكياس ..توحشتك صياحك .. ..

كيف تقولي نحبك معنتها نفيق على صوتك وما نرقد كان على ضحكتك وننسى بيك وجعاتي وقهراتي ....بيك إنت نداوي روحي ونشفى من ندوب السنين.. نصبح بيك ونرقد بيك .. ..

الحب يتلخص في المودة والحنان والضحك والشيخة والاحتضان كي يهرب الكلام ومتنجمش تحكي حملني بالقوي وإغرس روحك فيا ..

تحبني واسيني ضيفلي ..حسسني بوجودي ..خليني نحب روحي ..خليني نحترمها ونقدسها ونرا روحي مزيان وما كيفي حد وأنا السلطان على العرش ..خليني ناثق في روحي ..خليني نتحرر اكثر ونتمرد على العادات والتقاليد البالية.. ونعبر.. ونقول ..ونتفلسف ونخرج.. وتحتج.. ونصد.. وانت معاي مساندني في كل خطوة نخطيها ..

الحبيب يكون الشراع الي يخليك تقبل على الحياة ونتفتح على حاجات جديدة ..يكون المساعد ليك والخليل ..والشافي.. والداوي والحبيب والصديق والأب والأخ والأخت والأم كان لزم ..يكون خزينة أسرارك والسامع لخنارك وعياطك وحزنك ..يكون معاك بجانبك ..وقت السكات يسكت ويحترمك ..ووقت الكلام يخلق جو ليك انت وياه برك ..متعيشو كان انت وهو ..هذا عالمكم وحدكم مثمى حد كان انت وياه .. ميخليك ناقص شيئ ..يهديلك يخرجك يفرهدك حتى كان متوفرتش لفلوس ..بالنسبة ليه انت وما في حد غيرك ..وبيك نعيش ونحلم ونقبل على الدنيا ونحس بالفرحة تسري في بدني وتجري مجرى الدم في العروق ..

المحبة هي هدية على غفلة وبوسة مرصوصة على الخد ..وضحكة وسط البكاء ..هو بيك نولى إنسان ..ونعيش ونحلم ونتخيل ونطير بجوانح بالحب ..هو قلب أحمر ! فيه برشة نوار وزعفران.. هو الغفران والسماح من دار الدنيا

لدار لأخرة ..

كي تحبني إحترمني ! واسيني ..حررني.. إشفيني ..ضمني .خليك ليا وأنا ليك .ميزني بينهم الكل وما نختارك إلا انت من الكل ..نعتبرك شي ثمين لقيته ونستحفظ عليك من كل شيئ ينجم يفرقنا ..

تخليني نرا الدنيا ملونة ..العصافر طايرة والبحر مزيان بموجتو ..والشمس بزرقتها .. والنجوم بلمعتها.. والسماء بصفيتها ..تخليني نبدل نظرتي للدنيا وللناس ونقول مزال الخير ومزال الحب موجود ..

تحبني معنتها تكون معاي انا أكهو وليا أنا أكهو.. متكونش المضيق ليا ..متسبنيش ..بل إحترمني ..هزني معاك لأبعد بقعة تختارها خاترني واثق بيك ..إشريلي الكتب الي نحبهم وقلي نحبك ألف مرة في النهار خاترني ننسى ومنحب نسمع كلمة نحبك كان من فمك ..خرجها من عروش قلبك وأوفى معاي بوعدك ..

نحبك معنتها مننساكش ندور السند والهند وانت معاي.. وسط الناس والغوظة نختارك انت نتكلم معاك في عقلي كان مكش موجود معاي ..نكتبلك الف ميساج ونقلك فيه توحشتك ..تذكرتك ..كل تفصولة فيك نحفظها ..ندمن عليك ..الحب نيكوتين تتكيفو مع الحبيب ..وزطلة بحر متنجمش تسيبها ..هو دم الغزال ..وصبر الجمل ..وزين اللبوة.. وقوة الأسد ..وجبروت الدنيا .. وبرشة معاني متتلخصش في كلمة نحبك ..متكفينيش كي تقلي نحبك ..نحب نحس حبك يسري في دمي ..ويجري فيا ..ونتخمر بيه ونسكر كان لزم ..ونشطح على مزيكة الحب وانا نقول لقيت الحبيب ..

نحبك متتلخص في كلمة طيشها اخر الليل والا بإتصال جاف منك تقولي فيه نحبك ..

أصغطني بالحب ..حررني بالحب ..تمرد بالحب ..أدخل فيا بالحب ..أخلع الخلوة الي انا فيها بالحب ..كسر أبواب بيتي الظلمة الي حاصر فيها روحي وخرجها بالحب ..جردني من كره روحي وكره العالم بالحب ..عنقني بالقوي تحت المطر خلينى نغسلو بالشتاء ..قول معاي حي على الحياة معاك.. حي على انا خاترك تعتبرني انا الحياة ..تعتبرني النفس الداخل والخارج ..تعتبرني القلب والجواجي ..تعتبرني القديس والحبيب ورب الأرض .. وتكتبلي قصايد وطرب وتغنيلي الحب..تقولي نحبك أضربني بالحب ..فسدلي المنظم ..أهبط عليا ودزني في بحر الحب ..خبشني بانياب الحب ..وقولي "انت شمسي إنت متغبيش" ..

وغنيلي فيروز في عقاب ليل "أنا لحبيبي وحبيبي إلي يا عصفورة بيضا لا بقى تسألي " .... ..

قولي نحبك ونموت فيك يا أغلى ما عندي وما نملك ..إنت السلام والآمان والآمال والحلم والمحبة ورب الأرض والمنجم والتربة من الذهب ...