في ليل ولا كلو نهار فيه الشمس تبان من قمرة ضواَّية, من تعب من كلام ما ليه لزوم ما ليه معنى,

في نهار كلو أفعال ماليها زيادة كل يوم جديد هو اليوم متاع البارح أما زايد صفحة جديدة,

نهار بارد كيف أصحابو .. مغيم كيف عينينا إلي بكلها كلام و لا كلمة تشبه للأخرى, لا غزرة كيما أختها..

تسألهم تلقى قلوبهم معبية كي ريح هالطقس .. تهز و تجيب ,,, تتهز و تتحط مافيها فايدة, تولي نادم على السؤال و على معرفة أصحابو.. البرد هذا يفكرني في أفعالهم إلي مرضتني كيما مرضني البرد ...

في الوجه ضحكة و في قفاك كفوف لين تدوخ.. فما إلي يقرض لسانو أما فما إلي يحظر على سيرتو

و ما تتصوروش محلاها كي تحظر على إلي يموتو منك و يبداو يتبسمولك و إنت تعرف حقيقتهم ...

المهم ربي يجبرلهم و ربي معاهم ... تعرفو حاجة الموت ماعمرو خوفني على خاطر موجود و مالينا منو هروب, أما الحاجة الوحيدة إلي تخوفني هي العباد إلي لا عندهم لا عهد و لا ميثاق و إلي نهارت تحتاجهم يهينوك

و يوم ما إحتاجوك شلتهم و كبرتهم و قدرتهم... أما آش عندي نعمل ناس بكري قالو أعمل الخير و لوحو وراك أما المثل نسى باش يلوح ناسو معاه .. .