أنا عيشتي التفاصيل اذيكا ..منلقى روحي وراحتي وحقيقتي كان هكا ...راحتي بلحق كي نرا مراة كبيرة تكالي في قفة خضراء وغشير يجيها يجري يعاونها ...

راجل كبير في كار معبية وعطيتو بلاصتك وعطاك دعوة خير ..ضحكة من بنية صغيرة مروحة من المدرسة فارحة باول يوم ليها في القراية ..شربة من درجية ماء قديمة ..خرافة من تاليف جداي ونحنا دايرين بيها متشوقين باش نشوفو النهاية...بقايا وشم على جبين والا على ايدين جدي بالاخص الهلال ..اكا التكميشات والتراس الي منحوتين في الوجه كينهم خيوط مخيطين ..

مراة كبيرة ملتحفة في سفساري ابيض ماشية للسوق باش تشري ولد البحر خاطر دبارتها ليوم كسكسي مولا بيتها شاهيه ..جبة وكبوس وبرنوس جدي وقت يحط الحطة ويمشي يصلي صلاة العيد ويروح بقازوزة وحلوة العيد ونتلمو بيه ويقعد يعيب فينا كيفاش ولينا وهو كيفاش عاش في صغرتو ..وقتها كنت نستخايل في جدي بطل خاطر شارك في الحرب والدفاع على شرف تونس وقال "تونس حرة حرة والقوادة على برة "

روحي نلقاها كي ترجع بيا الذاكرة وانا صغير مشوطن والعمايل الي عملتهم وساعات نفرح كي حد ماسمع اشعملت والا الصحن والا الكاس الي كسرتو وقلت اختي كسرتو ومنعت من طريحة نباش القبور ليومنا هذا وين نتفركها نضحك وحدي ..

ساعات زادة كي تنغمس في حاجات حبيتهم ومرجعتلهاش كيما تصويرة والا مقال من جريدة حبيت تقراه ونسيتو ..دبارة لماكلة بنينة من مجلة ..روسات متاع قاطو ..مقطع من رواية سطرت عليها ومرجعتلوش ..كراس الذكريات متاع المكتب ..والحصيرة والغميضة والكاري مع الاصحاب ..وضحكة الطفولة والحنين للماضي وقت كنت تستخايل الي باش تكبر وتولي تسوق في الطيارة والا طبيب كبير ومشهور ...

راحتي نلقاها كي نتصب انا وامي الحصيرة ونحطو براد تاي ودشيشة بخور في الدار ..نحس اني قاعد في جنة ارضية ..قداش نحس بالامان وقتها وزرارق الدنيا بالوقت يتنحو ...

بالأخص وقت يكون الحال شتاء والناس لكل تجري مروحة كان انا نستحلى في قطرات مطر تحط فوقي ..نحس روحي عطشان وترويت ..عطشان من الصحراء نلهث نحب نتسقى بماء البركة والعطاء ...

منعرفش كان تشاطروني الرأي اما أنا التفاصيل هذيا تقتلني ..تغريني ..عادي نكون مكبشر نولي فرحان وزاهي ومحاجتي شي بالدنيا ..محاجتيش نكون فرحان اما نكون مطمئن ... هادئ ...منظم ..كل حاجة شادة بلاصتها

...مخي راايض والسلام الداخلي ..محاجتي شي أخر

محلاه شعور انك تكون مستكفي بقدرك ..تسمع الغناء ..تكتب الي تحب ..ترسم ..تقرأ كتاب على انغام فيروز والا فيروز ..ساعات تسلطينة على طريحات مزود كي توصل بيك الفدة..تتحرر..تعبر على مقصودك بكل ارياحية وتحس وتحب وتصد وتثور وتخرج ..وتكتب وتميل راسك ...

تكتب الغالط والصحيح خاطر" من لا يخطأ لا يتعلم " تطلع وتهبط ماخذ كان الي كاتبهولك ربي ...

والنفس نفسك وانت طبيبها...