الكلنا ما اخترناش نعشو الحكاية الي نعيشو فيها توا ...نحلمو نبدلوها ونقصوها ونزيدوها شويا هذا اذا كان موش برشا ...الكلنا تضرينا وتعبنا وطحنا وزادة بكينا ...بكينا خاتر لازمنا نبكيو ..وخاتر الدنيا مهيش بسهولة الي مزروعة في امخاخنا ..هو صحيح هي مزيانة كي الوردة اما وردة كحلة توري الدوني والخايب ...توري انيابها بعد ساعة ضحك ..انيابها الي يتغرسو في قلوبنا من غير رحمة ولا شفقة ...

انيابها الي كيفهم كيف الرمح الماضي ..يتغرس في وسطنا من نغير لا يدق باب لا يسمع جواب ...يدخل طول ويخترق عروقنا باش يكسر كل شيئ فينا زرعناه وتعبنا باش بنيناه ...وتعرينا باش يعيش ويكبر ...الحلم هذا هو الحياة الهانية المتجردة من كل ماهو خايب لابسها ومن كل ماهو شر فيه حابسها...الكلنا تعدينا بلحظات خايبة وبتجارب فاشلة ..عجزنا انى نكملو ثنيتنا خاتر سفينتنا خرقت وسط بحر الدنيا البلاعة...ها الدنيا المتوحشة الي ماهي مفلتى حد لا كبير ولا صغير ..ها الدنيا الفكاكة ..

اي انسان فينا عندو كي صوت لداخل يحس بيه ..يقرى بيه ..يضحك بيه ...وزادة يخمم بيه ..هو ساعات يتبدل يولي كي صوت الغشير الصغير الطاير والفارح ..وساعات اخرى يولي بكاء وغنار ودموع ..دموع من القهرة والغبينة ..من ظلم الناس لينا وكلمتنا الي متفارق سنينا ...والله خاطينى ..معملنا شيئ ...الكلنا نحتجو ونصدو ..الكلنا نتقلقو كي يحكي بينا حد بالخايب ويسمعنا الحاجة الي نحنا منحبوهاش اما في المقابل نفرحو ونطمئنو كي نسمعو كلام باهي يتقال علينا ...في كل الاحوال كلام باهي والا غايب ماهو كلو كلام ...شنوا الي باش يتغير !؟ كي منتغيروش نحنا ..! شنوا الي باش يتغير كي منحلموش ومن طيحتنا منقوموش وعلى حلمتنا مندافعوش ...وعلى ثنيتنا منلوجوش وعلى ذاتنا منحوسوش ...شنوا الي باش يتغير اذا منحطموش كل يوم حاجة فينا خايبة مبنية ..داخلنا ...علاش منهدوش كل شيئ خايخ فينا ونأسسو حاجة جديدة ...شبينا منخرجوش من سجن ارواحنا؟ ومن سجن الناس الي تقتل في عروق الراس ...علاش منخلموش ومنتمردوش ومنعيشوش ومنتفلسفوش ...!؟ علاش !؟

علاش منمنوش برواحنا ومنحبوش رواحنا ؟ نعطو اكثر ملي ناخذو ..و نقبلو اكثر منى نصدو ...ونحبو اكثر منى نكرهو ...كلها احاسيس محلاها تخلينا نعيشو مع روحنا وتخلينى كل يوم في رحلة للبحث عن الانا المفقودة وسط خبابل الدنيا ...ليلة الاقدار لعل ربي يبدلك حياتك

للافضل وانت اسعى باش تتبدل وتحسن اكثر وتقوى خير ملي تضعف ..وتحب خير ملي تكره وتسامح خير ملي تتغشش ...وتفرح خير ملي تحزن ...في الاخير نقلك حب الدنيا واقبلها بصعوباتها لانو في الاخير باش نرحلوا وكيما قال ابو القاسم الشابي

" اذا الشعب يوما اراد الحياة

فلا بد ان يستجيب القدر

ولا بد لليل ان ينجلي ولا بد للقيد ان ينكسر "

وحي على الحياة