ليك يا امي

امي ...

ليك انت يا غالية !! لعيونك المزيانة العالية ..محبتي ليك ماهي زايلة ..

يا ريحة التفاح ..يا شميسة تلمع على وجوه الصباح ..يا قعيدة في جنينة عربي وترتاح..

انا نحبك ..وحبي ليك لا تكتب في كتب ولا قال عليه عم علي الشنب !! ..من غزل ومدح وغناء وطرب .. كي نغزرلك ننسى الوجيعة و التعب ..انا نعشقك ونعشق التربة الي تخطي فوقها ..انا نحب الدنيا الي انت فيها ! ..

انا نكتب ونتحدث عليك .. ياخي قداه باش نبقى نوصف فيك ..وفي زين عينيك وولمعة خديك..ضحكة سنيك على الصباح ..دعواتك لي بالنجاح والفلاح..قداش باش نعبر لناس الي انت الملايكة الي مهبطتها السماء ..انت روية العطشان بالماء ..انت المطرة والشتاء ! انت الحب والوفاء ..

انت البحرة وموجتها ..انت الطبيعة وخظرتها ..انت الشجرة وخيرتها ..حمرة التفاحة وفايدتها ! ..خوخة المحبة وعشقتها ..! انت براءة الصغيرة وضحكتها ! انت السماء وزرقتها والشمس ودفيتها ..انت القمرة ليلة اربعطاش وضوها الي ينير القلب ويجبرلو خاطرو ويزيل عليه الهم والتعب ..انت الحورية الجميلة الي يحكو عليها الكتاب..انا نحبك وحبي ليك مهوش مكتوب وموش مقال ..حبي ليك يتحس ويسري في البدن ..ويجري مع الدم ! حبي ليك عيوني الي نرى بيهم والهواء الي ننتنفسو ! ..الكلام معاك ميتقالش اما يتحس وروحي مجاورة روحك ! وتقوللها :

محلاك يا للة .. محلى خديك يا زين الغلة ..

مبهى ضحكتك يا عروسة بحنتها تتجلى ..

يا حورية تلمع في وسط الماء تتسلى ..

ما اجملك يا وردة متفتحة ..

يالي تفوح منك ريحة الريحان وانت عصفورة متبجحة ...

يا للة يا زين الدنيا والقمرة ..

يا ضوء الشمس في نهارها ! يا سمراء ..

يا روح يا عسلت النحلة يا حمراء

يا دقلة من نخلتها تتدلى ..

يازين اللة خمس وخميس عليك وعلى ها الطلة ..

يا ريحت الياسمين يا فلة

يا عيون الخلة ..

نحبك ونموت عليك وعلى ها الطلة ..ربي يخليك ليا يا للة