نحنا في دنيا..في مدرسة منها تتعلم الباهي من الغايب ...منها تفرق بين الصادق والكاذب ..بين الي يحبنا والي يكرهنا ...كلنا مرين بتجارب فاشلين كرهنا فيها ارواحنا وهجرناها ...حبينا وتحبينا وكرهنا وتكرهنا ...تنافقوا علينا وكذبوا علينا ...كلنا تعرضنا لناس الي ينطبق عليهم صفة في الوجه مراية وفي القفا فلاية ..فلاية تندب فينا بالاحرش تخرج في الدم وتخرج في الماء والملح الي تاكل بينا ...تتلفق علينا سيناريوات ومسلسلات وبرشا حكايات معقدة ..حكايات داخلها برشا غل وكره لينا وحقد تجاهنا ...

والسؤال يطرح نفسه ياخي تخلقنا باش نعيش كيف الحيوانات ناكلو في بعضنا !؟ ياخي علاش عندنا مخ نحنا !؟ ياخي علاش تخلقنا وعلاش موجودين نحنا لهنى !؟ هو صحيح العقل يميز الانسان عن الحيوان اما هنى ولينا كيفو الحيوان والا اتعس منو في عيشتنا حاليا ..علاش ولينا نعيشو حوت ياكل حوت وقليل الجهد يموت ...علاش الي يغلط مرة معنتها لازموا يختار بين حلين يا يموت ويتنسى تحت التراب والدود ياكل فيه باش العار يتمسح من الذاكرة .يا يتجسن في زنزانة الدار بعيد على كلامهم القاسي الي مينطاقش ويجرح ما تبقى من شطايا القلب المكسور ...

ياخي علاش منقبلوش الاختلاف !؟ علاش كيف نشوفوا حد مختلف علينا نقعد نثبتوا وندققوا فيه ونحسسوه الي هو مختلف علينا !؟ ياخي علاش نحتقروا الناس وما نذكروهم كان بالخايب الي فيهم !؟ هو لكلنا تعرضنا لفئة من ناااس مريظة متنجم تعيش وتتفرهد كان ما تاكل وتنهش لحم العباد وتتبنن بيه وبمطعموا الي يظهرلهم خايب ومفيه ما يتشاف ..الناس هذوما هوما نفسهم الي تلقى في قموسهم التمقعير..والخزرة الدونية لناس الكل ..الحسد والبغض والكلام السم المدهون بالباهي من البرى ..الكذب والانانية والكراهية ساكنة قلوبهم ومزروعة ثميكا تتسقى بالكلام والحرف الخايب على بعضهم ونفسهم هوما الي حاسبين ارواحهم فرك ونص وهوما بمقص النار ميتهزوش ...يضحكو على النقص الي في العباد وناسين نقصهم واختلافهم وجهللهم ونفاهم ناسين الي الكمال لله فقط ...

للعلم ولتذكير الي جميع الناس سواسية ولاد تسعة اشهرة من اب و من ام ...ومن رب واحد ...

علاش منتبدلوش للخير ...علاش عندنا مخ نحنا ياخي باش يخدم كان للشر؟ .. علاش في بلادنا البقاء للاقوى في كل شيئ ...علاش الزوالي نحقروه والغني نقدسوه ...علاش الي يحتاج يتذل والي جيعان يتحرم ...والي عندو الفلوس

...والي عندو الفلوس والجاه الساقين متاعو تتباس وتتعبد  ..علاش ناسنا تبدلت ولاات ذيوبة جيعانة مشتهية كل شيئ ..علاش المرأة تمثل كان جسد ومتعة جنسية وعملها في الحياة يقتصر على الاعمال المنزلية وما يتبعها من ذالك ..

دنيتنا دموس خارق مكفن وسطو نواح وعياط حارق ..حياتنا حبلها جهاد ونظال وبرشا تحدي وقوة عزيمة باش نبقوا عايشين...دينى دين اسلامي ينص على التسامح وعلى الوطنية والاستقامة والكفاح من اجل النيل بحياة هانية مطمئنمة ...ونبينا الف الصلاة عليه اقر على هذه السلوكات وهو بيدو كان يتبعها ويتقنها ويرسمها وفق مناهح عديدة قصد ايصالها لنا لتتعاقبها الاجيال ..لكن توا الامور تبدلت ولى المتربي والعاقل معنتها سكبان وداهية ...ولى توا الي يصلي بنية منافق وكذاب ..ولى توا الي يصلي يربيلنا لحية طويلة وجبة تحت الركبة ويحرم مرتوا من الخروج ويجبرها لارتداء الحجاب الشرعي وتبقى اسيرة البيت..وهو في الليل باعد صلاة العشاء وباعد ما يقعد في القهوة جميع بنات الربط كلهم يجبدهم وحافظ اساميهم اكثر من سور القرآن ...

برشا امور تبدلت وتغيرت ...وبرشا حكايات تجردت من اصلها العربي الديني ولات خايبة وتعيف اصل نحسو توا سلوكيات بعض الناس مغلفة ومتغطية وراء قلوب  مسوسة وعقول مشوشة..وبرشا تلقيف وتسكبين وترهدين ... واذا نستنو في الدنيا والبلاد باش تتبدل للخير يبطى شويا خاتر مزالت عقلية فينا مزروعة بعروقها لازمها تتقلع منى ويشيح الراس وينشف وكيما يقول مثلنا التونسي "الي ليك ليك والي خاطيك خاطيك "

واذا منتبدلوش توا الدنيا باياماتها تبدلنا..من حاجتنا تفكلنا والي نحبوهم تاخذلنا وعلى ضحكتنا تذلنا ...