عقارب الساعة تدق ..الدم يجري في العروق ...الهواء داخل خارج بقوة ..الرمشة وراء الرمشة ..الا انت محبيتش تخرج مني..

في كل لحظة نحس بالدنيا تضياق عليا وتخنقني ...كل يوم تخرجلي مشكلة جديدة..كل نهار وليت نبكي وكان مبكيتش راني نرحي من داخل ..لدرجة وليت نحب فكرة اني نموت ونتدفن تحت اللحود ونمشي للعالم الاخر ..
وحتى كان باش نحب نهرب بالموسيقى والافلام والماكلة البنينة والنوم لساعات طويلة ..هاذم الكل معادش يخذروني ..معادش يهربو بيا وينسوني في مرارة الدنيا ! ...
ساعات نحط الغناء بالقوي لين معادش تسمع شي كان صوت المغني يعيط في عروق مخي لين نزطل ومعاد نحس بروحي والا بالعالم جملة ..

نحب نطير ونجنح بجوانح ريش ونتخلى على افكار راسي الي تعذب فيا ونهرب من بدني ..خاطر نحس بدني حبس ..سجن ..محصورة فيه روحي الي تحب تتحرر من جاذبية الارض ..نحب نطلع لفوق ونطير مع الاطيار ..ونرقد في السحاب ونصبح مع الضباب ..نحب نعنق النجمة والهلال في الليل ..خاطر منحبش نبكي على الاطلال ..

ياخي جربتوه الاحساس هذا ..الناس لكلها مشاو عليك هربو لبعيد وانت قعدت لتالي وحدك هازز الحمل وحدك ..قوتك معادش فيها ..صبرك وافى ..عمرك مشى ..وبدنك هبى .. ..اصلا نسوك الي انت بشري منهم ..ميلوجوش عليك حي والا ميت ..ماكل والا جيعان..راوي والا عطشان .متخطي والا بردان ...كل فول لاهي في نوارة...
كل واحد يجبد في الغطاء ليه ..الناس لكل ولو ملهوفين على الدنيا ..الناس لكل ولو يخدمو في امخاخهم ..الناس الكل ولو خايبين حتى الي قلت عليهم باهين طلعو بو دورو في اللخر وساقطين ...
قعدت كي بول الجمل لا تالي ولا والي ..وحدك براسك تبوم كيف البوم ..في غابة والا في متاهة متاع حيوانات تسمو بشر والا بني الانسان وهوما الانسانية يعرفوها كان في الجنس والتمنييك على الخلق .....

الاحساس هذا يحمل وجيعة متنطاقش ومرارة متنذاقش ..تحس العالم داخل بعضو ..برشة خوضة وحس وهزان ونفضان ولطخان وحد ماهو فاهم حد ..اي وانت في هذا الكل وينك ..وين حيك ..وين ضايع ..وين هازتك المنامة والحلمة ..

تي انا حلمة ي ولدي فاش تخرف ..معادش نحلم ..خاتر حلماتي تبخرت ومشات تميح مع الارياح ؟ ..

انت هاك الكتلة متاع الاحزان المتنقلة والمنسية والي في تركينة لا ديار ولا زيار ....
خاطر تقعد وحدك لسوايع لنهارات ..تي لاعوام ولا الا انسان يحكيلك والا يجيك ومن غمتك يجليك ...
تدور في الفيسبوك ولا حد يكلمك وحتى كان كلموك راهو اعرف باش يقضو بيك قضياتهم وينسوك ..حتى اقاربك من العائلة كان النفاق ..صحيح يسألو عليك ويسلمو زادة .. لكن حتى حد منهم ميعرفش قداش موجوع من داخل ومرضرض ومحتاج حد يداويك من جروحك وينسيك في ليالي بكاء وتعب وحدك ..

قداش خايب الفراغ والاشيئ والاسود الي ماتدل منه حتى شي ..وزيد يوجع كي يتلكمت بحد ويحطو في دورة فارغة مفيها حد ..فااااارغة لا انسان ولا حيوان ولا شي ..كان الاحزان وافكار الماضي وذكرياته وافكار تعذب في راسه ..

ياخي حسيتو مرة انكم ميتين بالحياة ؟ اي عبارة ميتين ..لا حد يلوج عليكم ولا يسأل ..لا حد يكلمك ويطمن على اخبارك ..لا صديق يفرت خنارك ..تليفونك يقعد اشهرة ميكلمك عليه حد ..ديما ساااكت لين كرهت السكوت ..حتى كي تخرج متلقى متعمل تفد مضابيك تحب ترجع لفرشك وبيتك الظلمة ووافكارك الخايبة ...
تكتب.. تعبر ..تميل ..تحير ..تفكر .تبكي ..تسكت .. تنبح ..تضحك تكشخ وتتحرر وتعري ولبكاكك ما توري .وهذا لكل وحدك....

صحيح الوحدة باهية ومحلاها لكن روحك تفد ..بلحق تفد خاطر الوحدة تجرك تقعد وحدك بلا شي ..تي حتى باش تعمل حاجة توفى فيسع وتقلق ..
مضبيك القضية متوفاش ..الكتاب مفيهش نهاية ... السيقارو مفيهش بونطة ...القهوة مفيهاش اخر رشفة ..والحب مفيهش احزان ..والحياة مفيهاش حد ..مضبيك تضحك ومتخافش لا الضحك يولي بكاء..مضبيك تعنق امك والسماء ...مضبيك تترمى في حضن بوك من غير صياح والا حشمة والا بكاء ..مضبيك ديما فرحان .. مضبيك ترقص على الدنيا وتموج مع موجاتها ..وترقص مع غنياتها وتتبدل مع شناتها وتتاقلم مع حلماتها ..

جربتو احساس ترا في الناس وحوش ؟ والا منافيقن...
الكذب والظلم منهم يسكسك كي الشواطن الي متخبية وراء ماسك ملايكة ؟ ..

جربت تقعد وحدك ماك تعمل في شي وديما تاعب مهدود فادد قالق ..برشا روتين ..واياماتك لكلها تتعاود ومثما شي جديد ..

وباش نكون معاك صريح اكثر ...
جربت تعمل الي عليك وتدعي لربي لدرجة البكاء وبلحق الامنية اذيكا تحبها تتحقق خاطر تعبت عليها وناجيت ربك ليل نهار وتشويت تحبها تصير وفي لخر متتحقلكش وتخسر كل شي وتكره روحك ؟ ..

حسيت مرة الي الدنيا مقردة عليك ..الزهر مهوش ماشي معاك . ضايع بين الناس ..خاطرهم ميشبهولكش ..مهمش كيفك ..مكش منهم والا تنتمي ليهم .انت تنتمي لناس الفيانة الي عيشتهم اهانة ..ناس الريشة حتى لو كانو لابسين خيشة...ناس البهجة والضخامة واللهجة ..ناس الضحك والقعدة حتى على السيمان مع كسكسي ورمان ...

ساعات نقول زعما الي يشبهولي ويهم ؟ كيفاش يعيشو ؟ زعما كيفي قاعدين يطيحو ويقومو ..زعما يحبو الدنيا كيفي ..زعما عندهم اصحاب والا وحدهم حزانة ؟ ...

انا وبرشا من الناس تنطبق عليهم المعذبون في الارض ! اي نعم خاطر القطيع من البشر هذا ميشبهلناش... مهوش عالمنا الي نحلمو نعيشو فيه ونرقصو على طار بو فلس ..مهمش الناس الي نتمنو نتحاورو معاهم ..مهيش العقليات الي تقبل حق الاختلاف ونتأقلمو معاها . مهيش العادات والتقاليد الي تخلينى نعيشو ونشمو طعم الحرية ونشوة الحياة ... ..

العالم هذا بكلو كذاب ..مهموش باهي مهوش مزيان ..زعما يهديلك نصيحة وفي ضهرك يعطيك الف طريحة ..وفوق اذاكا يواجهك ويحطك انت الغالط بعينه الصحيحة .....
عالم النفاق والسبان والترهدين ...عالم اللدغان وايذاء الاخر ..عالمنا للاسف عالم الشواطن بالقرون ...
ناس بكري قالو اللسان فيه عظم ..وانا باعد مشفتهم وعشت معاهم نقول اللسان فيه سم يلدغ واللدغة متبراشي ..كلامهم عسل يقطر عسل لفعة مسمامة ..
ميهمش خاطر لغناية تقول " خلي يقولو اشهم الي يشكر والي يذم

وانا نقولك توا ...
مجيتش لدنيا هاذي باش يكذبو عليك ويمشوك على طريقهم ويحطوك في حبسهم الظلام ...جيت باش تعيش مالا عيش ..جيت باش تطيح وتقوم مالا طيح وقوم ..جيت باش تحقق احلامك يلا من حينك اخدم على حلمتك ...جيت باش توري روحك  مالا انحت ذاتك وهدم وعاود ملس روحك من جديد وكسر الصنب الحديد متاعك ..

ونزيد نقلك ...
ايجا اغرق معايا بين الكلمة والكلمة ..ايجا عيش معايا بنة الحلمة ..ايجا وجودك ماكيفو حد..ايجى انت كل شي ..ايجى اقرا معايا الكتب ..ايجا علمني كيفاش نحب ..ايجا خلينا نعاونو الناس المحتاجة ..ايجا خلينا نعملو حاجة ..ايجا نحب نكبر معاك..ايجا نحب نشدلك يدك ونعشق في سماك ..ايجا نحب نتلهى بيك..ايجا نحب ندللك ونشيخ معاك وفيك خاطر الغناية تقول " تبعني نبنوا دنيا زينة ..."  ...