فمّا حاجات ما جاش لبالنا نهار باش انّجموا نعملولهم..ريتوهم ، الحاجات لمخُبيين فينا لداخل في تركينة، كي الدّنيا تهدا و تتسكّر الشبابك بالفردة بالفردة..يتسرسبو قدّامنا .. نغمضو عينينا ، ما يفارقوناش، لين يهزنا النّوم
قصّيت شعري..في لفتة منّي انّي قادرة نتخلّى على كلّ شيء.. شعري ، ماللّي كان طويل، مسرسب، سيّبتوا في لحظة.. فما بالك بالبلايص.. بالحديث فالتراكن..بالعباد لي يتشابطوا عالدّنيا طالعين لربّي ، تقول باش يقورنوا.. بكلّ حاجة يشوفوها لعباد كبيرة و نشوفها أنا صغيرة..أصغر من الذرّة

حسّ المقصّ لتوا في وذنيّا.. ما فارقنيش لحظة. تصويرة خصلات شعري فالمراية لي مقابلتني قاعدين يتطايحوا ،، مع كلّ خصلة تهبط، يطيح معاها شويّة مالدّنيا .. شعري لي كنت نبدا بيه نهاري و نوفيه قبل ما نحط راسي عالمخدّة.. نتذكّر نهارها كي خرجت من عند الحجّامة كيفاه حسّيت النّسمة تلسعلي في أكتافي و كرومتي.. حسّيت بالنّسمة لي جاية من عند الجبولات باش تخفّف قوايل الصّيف الحارّة

بقدر ما نهارتها استصغرت شعري، حسّيت بعنيّا أكبر مالدّنيا.. في مُخّي ، كنت ديما نخمّم إنّو ربّي كي ما يحبّش عبد يبليه بعينيه، لكن بالوقت عرفت إنّوا الحرمان لكبير كي يكون عندك عينين و ما تشوفش بيهم كيما يلزم
تعلّمت إنّو الدّنيا مراية تعكسلي الحاجة لي نحب نخزرلها. تعلّمت نغوص فالدّنيا أكثر و أكثر و نتجاوز البصر للبصيرة، نتجاوز حدود الخزرة المليانة حسد و كره ،، خزرة الحقد و الثأر ،، خزرة الشماتة و النّار الوڨادة، خزرة الكذب ، خزرة النّقمة ، خزة القبح..و نُبصر الحقيقة، الفرحة و الزّين. تعلّمت نشوف للدّنيا من جوانبها الكلّ و نختار أنا الجانب لي نحبّو و نحطّو على قياسي، نقرا العالم بعينيّا، نفرح بعينيّا ، نضحك بعينيّا و نعيش بعينيّا
تعلّمت نحتوي العالم في عينيّا و كي نحبّ عبد نقلّوا راك عينيّا..