Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

عقدة انوثة #27

identite-sexuelle-perdueZaineb S. - زينب س


كانت قاعدة عالكرسي و حاطة يدها بين راسها ..تشوف فالقهوة كيفاش تقلبت ..تخزر لفاروق و تبكي ..عاجبك هكا شوف شعملت سي فاروق..يمشي و يجي حك لحيتو بعصب و صاح ..تنجم تسكر فمك نحب نفهم لحكاية ..مخلهاش تجاوبو..

دار للروج..الروج منين جا الفرخ هذا منعرفوش ..والله فاروق انا زادا منعرفوش هاو قالو مش مالحومة ..فاروق : صحة لمو فلت مني وقفو بيناتنا الرجال اما معندو وين هارب تو نسقسي و نطلعو شكون..الروج : وسع بالك خويا هاك ريت ولاد الحومة الكل دارو فيه حمى اختنا اذيكا متزيدش تمسخ يدك بيه..حمى قامت تصيح:شبيك فاروق مكفاكش الي عملتو فالقهوة حتى مالكليونات طردتهم الكل و تحب تزيد تلوج عليه ..خزرلها خزرة تخوف عينيه تقدح نار عض على شفايفو ..دار للروج ..

الروج برا روح ..الروج قعد يخزر لحمى مش عارف شنوة يعمل ...فاروق ما عاتش ينجم يسيطر على اعصابو ..ما تسمعش فاش تستنى ..ايا خويا انستو مالا ..خرج الروج قعدو وحدهم فالقهوة ..خزرتلو خزرة تحدي و قامت جات خارجة ..جبدها من يدها بالقوي و هبط الريدو و سكر باب القهوة ..قعدت تخزرلو ..

شبيك علاش تسكر فيه شيقولو علينا الناس ..بعد الي صار اليوم مازلت تخمم فالناس ..كان يحكي ببرود يخوف يخبي وراه برشا غش ..عمرها ما راتو فالحالة اذيكا ..شبيك تحكي هكا كينها غلطتي شنوة ذنبي انا ...قرب منها و هي وخرت لين لسقت فالحيط لكن مهبطتش عيناها من عينيه..مازلت تعاند و تحل في فمك حازقة بدنك و صدرك و داخلة لقهوة كلها رجال و متحبهمش يتمنيكو عليك ..لا مش صحيح ولاد الحومة الكل يعرفوني و يقدروني كان الكلب هذا هاو طلع مش مالحومة ..حميييدة ..صاح فرد صيحة ..سكر فمك قتلك منحب نسمع منك حتى شئ هز يدو في وجهها تفجعت في بالها باش يضربها عيناها وساعت ..

ضرب يدو فالحيط الي وراها ..بعد علاها و جبد سيقارو تكلم بصوت مخنوق ..مش فاهمة شئ تعرف كان تعاند تضحك علي فالرجال طلعتني طحان بيناتهم ..مش فاهمة لتوا الي حياتك تبدات و ما عاتش وحدك لازم تعمل الف حساب قبل ما تعمل حاجة ..كسرت كلمتي و مسمعتش كلامي و الي خفت منو صار...حسعت بوجيعة في كلامو حست بيه اما خايفة تضعف و تظهر الي هو على حق و هي غالطة...قربت منو ..باهي اعطيني سيقارو راسي وجعني ..ي ما تزيدش تهبل ر***** عاد ..باهي باهي مش لازم ..رما السيقارو فالقاعة و زاد جبد واحد اخر شعلو ..حبت تهدي الجو قربت منو حملتو من تالي ..فاروق ياخي متوحشتنيش ..مجاوبهاش ..فاروق معاتش تحبني انتي ..تنهد بالقوي ..تعرفو يحبها و يموت علاها تعرف الي قربها منو نقطة ضعفو..

تعرفو ما ينجمش يقعد مغشش علاها كان عندها ايمان بحبو ليها ..متاكدة الي حبو ليها ينجم يغفرلها اغلاطها الكل و الي فاروق مينجمش يعيش من غيرها ..حطت راسها على ضهرو ..فاروق تاعبة والله تاعبة ..من شنوة مني ؟..لا مالدنيا الكل ..دارلها جا مقابلها ..حمى شفما مخبية عليا حاجة ..كيف شنوة..كان جيت نعرف ما نسالكش اما حاس فما حاجة..بربييي علاش قلت هكا مفما شئ كان حكاية القهوة مقلقتني و ديما نخمم فيها ..حمى انسا بعد الي صار كان مزلت باش نخليك تخدم فيها ...شنوة فاروق تقرر و تسطر وحدك و انا وين في هذا الكل ..تصرف امورك جيب شكون ياقفلك علاها ...ما عندي ثقة في حد قتلك شدها انتي محبيتش ..انساها لحكاية هذي تحب يقولو داخل على طمعة و يخدم عند مرتو ..بففف ناس متخلفة و انتي طبع فيهم ..متخلفة مش متخلفة هذا اخر كلام عندي ..خزرتلو خزرة تحدي ..انا هكا و مش باش نتبدل فاروق ..شدها من يدها غرص صوابعو فيهم ..اخر كلام عندك ..اي اي ..نطرلها يدها حل الباب بالقوي خرج و خلاها ...مش عارفة علاش قتلو هكا كانت باش تقلو عالحل الي لقاتو ..

حبت تقلو انا زادة ما عاتش نجم نكمل هكا حياتي تبدلت و لازم نتبدل معاها ..حبت تحكيلو كيفاش باش تبدل القهوة و تخليها ميكست لكن مش عارفة علاش الكلام وقف و محبش يخرج ..كينها حبت تأجل المصالحة معاه ..حبت تزيد تربح شوية وقت بعيد عليه و تفهم روحها..تشوف في كرهبة مريم وقفت قدام القهوة ..هبطت تخزر للكراسي و الدنيا المقلوبة مصدومة ..حمى شنوه هذا شنوة الي صار ..عركة متحط شئ في بالك وين ماشية انتي ..مريم تردت شوية و بعد قالتلها ..

كلمني انيس يحب يقابلني خليتو جايني للوتيل متاع العادة ..حمى حست بوجيعة هذا الي كان ناقصها تسمع توا على انيس ..مريم مش عارفة فاش نعمل ..مش عارفة مازلت نحب ننتقم منو ولا..مريم تربثت ...لا حمى مترخش توا بعد ما قربت توصل للي تحب عليه نسيت شعمل فيك ..حمى استغربت من كلامها ...خليتك خايفة و قتلي سيب علينا مالحكاية..اا اي صحيح اما كيف عرفتو حسيت بيك يستاهل الي باش يجرالو ..حمى كانت تاعبة و معينهاش باش تزيد توجع روحها و تحكي على انيس ..باهي امشي و رد بالك على روحك متمنوش راو ساقط ..فرحت باستها من خدها ..تهنى ايا ا توت..خرجت ركبت في كرهبتها فرحانة الي باش تراه ..


زينب س.

SaveSaveعقدة انوثة #27