وقتلي مشيت لمكة يدوبى وصلت لغادي وهبطت من الطيارة ، تبعت القائد الى هازنا ويعلم فينا منين ندخلو ومنين نخرجو وكيفاش تتعمل اذيكا وكيفاش تصير الحاجة اذيكا ...لحقيقة انا مكنتش معاه خاترني كنت مخمض عينيى ونستنشق في هكا الريحة النقية ، الطاهرة ..ريحة محبتش تتنحى  ليومنا هذا والا باش تتنسى من مخي  ..

خاترني كنت منسجم معاها وماني حاس بحد بجنبي غير اني عايش مع روحي لداخل ونرسم في برشا مخططات في مخي من قبيل وين باش نمشي وقداش باش نقعد في بلاصة اذيكا وبلاصة لخرى ...اكهو عاد طاح  الليل ومحسيتش  بالوقت يزرب لها الدرجة..

ومزينها اكا ليلة قمرتها ضاوية وليلتها هانية وسكينتها باينة وريحتها فايحة على كامل الارجاء ..قعدت نخزر  لنور ربي  الي هابط والطمأنينة الي محبوسة في قلبي لداخل ..مشيت خذيت سجادتي وهبط ركعت لخالقي ونشكر فيه خاتر انصفني وحبني وكتبلي باش نزور الكعبة المقدسة المعظمة ..وانا هكاكا ومنفيق كان في صوت اذان الفجر يأذن ..هو قال" الله اكبر" وانا دموعي شفقت عليا وعودت معاه الله اكبر الله اكبر ..وخرجت منغير منستنى حد ..قلبي فارغ ومخي افرغ ولا حسيت لا بجوع ولا بشيئ ..رغملي ما كليت شيئ ..لكني معبي بالايمان والخشوع لربي ..وقابلت للكعبة وركعت وكيف كملت ما تمنيت شيئ تبلجت وتسكرت ..دموعي هبطتت وحدها وحكت عليا ..وزدت ركعت وفي كل ركعة دمعة ومع كل دمعة امنية تهد الاجبال العالية وتزعزع الحجار الخالية ..في الوقت اذاكا متفكرتش شكون ضرني وجرحني ..تفكرت حد برك تفكرت امي العزيزة الغالية الي كانت كيف الشمعة الي تضوي طريقي ..وكيف الشمس الي تنورلي دربي ..دعيتلها بالرحمة والمغفرة ..دعيتلها برشا دعوات  مستجابة وكملت مسيري ودرت حول الكعبة سبعة دورات وبعدها قبلت الحجر الاسود ..وشربت من ماء زمزم الي يقول عليه الشافي لكل شيئ مجسون في البدن ومحبوس داخلو ..

وكنتلي من احسن الايامات وانقها خاترني حسيت بروحي تخلقت من جديد وزدت قويت اكثر ووليت مقبل على الدنيا بصعوباتها اكثر حتى من قبل..ووعدت روحي اني نكون متسامح ولطيف اكثر من توا ..وباش نقبل روحي ونحبها قبل النااس ..وباش ننشر الامان والسلام في كل بلاصة نمشيلها لانها الدنيا هاذي فانية لا باش نهز اموال ولا جاه ولا شيئ باش نهز افعالي الي فعلتهم واعمالي الي عملتهم وحكاياتي الي حكيتهم ورواياتي الي رويتهم  ..اما في نفس الوقت حزنت خاتر وقت المرواح قريب يجي  ..وكيفاش باش نفارق ارض نبي وقدوتي رسول الله ..كيفاش باش نفارق ارض النقاء والقداسة ..روحت وهبطتت من طيارة وركبت في التاكسي وروحت لدارنا ومنفيق بروحي كان نتخبط في لعرق ونحلم اما تقعدلي من احسن واحلى الحلمات الي حلمتها خاتر ريت فيها امنيتي الي باش نجتهد باش نحققها باذن الله ...