رمضان جاء إنشاء الله نصومو على النفاق والكذب والرياء ، نصومو على الافعال الخايبة والتمنييك على الناس ، إنشاءالله نصومو على الدناءة والسذاجة والحقد والكراهية ، إنشاءالله مننساوش القطاطس والكلاب والعصافر والطيور بشريبة ماء والا بشوية زيوان ، رمضان شهر التسامح ميسالش سامح غيرك ، سامح الي ظرك وحقرك ، السماح قوة ويخليك مرتاح ، حل قلبك للاخر وعاون بلي تقدر عليه ، دق الباب وخوذ الجواب ، أسال وطل وحنحن وأعطي بوسة مرصوصة وكون إنسان ..

رمضان شهر حاول تصوم فيه موش كان على الماكلة والشراب ، صوم فيه على التمنر ، على الغشة ، على الكذب والتلعيط ، أعطي لروحك مهلة وحاول تكون إنساني .

رمضان شهر العبادة صلي وأركع وسبح وأدعي لربي يرزقك الخير ،

رمضان شهير من زمان يطل عليك مرة في  العام حاول تكون فيه طيب وصاحب معروف وصاحب عشرة ، راهي حتى الضحكة في وجه خوك المؤمن عبادة ، متحكيليش تاعب من الصيام وتاعب من القومان بكري ، كلنا نجرو وراء الخبزة اما عاون حتى بالبسمة وعلاش لا تتفكر خوك الجار ذوقو فيم معاك ، واعطي من جيبك الي كتب من ربي صدقة على صحتك وعلى اولادك ، متنساش الجار للجار رحمة ، وصفي قلبك مع الي ضلمك وخلاك ومشا نعرف تعبت ، وظرك وهدك وطيحك ومرمدك اما تعلم سامح وخلي وراك ، صفي قلبك راهو المسامح كريم ، وصفي روحك وكون هادي ، وانشاء الله ينعاد علينا وعليكم بالبركة