كبرت ...
كبرت وتعلمت الي حتى شي ميستاهل نتأثر عليه
كبرت وهموم الدنيا كسحتني وفهمت الي الحياة مهيش مجرد دنيا نعيشوها ونرحلو منها بل هي مشروع مقاومة ونحنا واجب علينا تلبية الرسالة الربانية على أكمل وجه ...
كبرت وفهمت الي الثيقة متتعطاش للناس الكل ..والحب ميتهداش ..والسعادة متتشراش بالفلوس بل تكتسبها ...والي الحرية متتقدمش في طبق بالنوار وإنما تفكها فكان من سنون الدنيا ...فهمت الي تجارب الماضي يا إما يصنعو منك إنسان ميتهدش وقوي ..يا يقتلوك ويخلوك سجين ليهم ...
فهمت الي مثماش صحبة في الدنيا بقدر مثما مصلحة وحب التملك والسيطرة على الآخر ...
وتعلمت نعفس على الجمر ونضحك ..وتعلمت نبات على السيمان وماكل طريحة من الدنيا ونخرج للعالم في كامل قوتي ..

تعلمت نمسح دمعتي وحدي ومنعمل على حد...

تغدرت وتخنت وضحكو عليا وتمنيكو على شخصي وبكيت من ذالك عدة ليالي ومنكذبش ومننكرش ...وزرت أطباء نفسانين ...وعالجت جروحي وحدي وقت طحت ملقيت حد كان روحي ...

صديق الطفولة الي كنت معاه وقت الصغر والبراءة وصنعت معاه السلام والآمان  تبدل عليا وقت كبرنا وكل وا حد شد طريقو ...
فما ناس ما إستدعيتهمش لحياتي دخلو فرعسوها وخرجو ...

مرحموش كائن بشري وإنسان يحس بلعكس نزلو عليا وعفسوني ووكلنو طريحة لتوا نتذكر في تفاصيلها ...

كبرت وسامحت اما منسيتش....
كبرت وأي كلمة نخرجها  من فمي ونحسها تمس في ذات الإنسان وتقزمو نلغيها ونفسخها...

تعلمت إلي الماخذة بالخاطر والتربية وإحترام الإنسان الأخر مهيش أخلاق وقيم فقط ..بل هي ثقافة نتعلمو كيفاه نتعاملو بيها ...
كبرت وتعلمت الي مثماش ثقافة واحدة بل ثقافات ومثماش ثنية وحكة بل ثنايا ...ومثماش نجاح واحد بل نجاحات وليوما تبكي وغدوة تضحك ..ليوم تطيح وغدوة تقوم ...ليوم تتعب وغدوة تحيا

وتعلمت نقوم بعد الطيحة ...ومنحلمش برشة ونثني الركبة ..وأي حاجة مقلقتني نلغيها من حياتي وأي إنسان ميحسنيش منحسوش ..ميكلمنيش منكلموش ...تعلمت الي الصمت حكمة ...والي السكات يخلي كل إنسان يرجع لمكانو ولبلاصتو الحقانية ...
تعلمت نبني عالم ليا وحدي لفوق وين السماء والنجوم والڨمرة ومندخل فيه كان الناس الي تشبهلي ونحسها تفهمني ونتخاطر معاها ...
..
كبرت ووليت نخمم في غدوة ..وحسيت روحي هديت ورزنت ومعادش نبكي برشة وثنيت ركبتي ..وفهمت الي الدنيا تحب شكون يكسح معاها راسو وتحب شكون شادد صحيح فيها ...
تعلمت من طيحاتي ومن هزاني ونفضاني ومن قوتي وبكائي وتعلمت مناثقش في الي يجي ومنعطيش الجنب للي يجي ...والي يعطني الحب ويحترمني في شخصي نحبو  ونقدرو ...
وفهمت إلي مال الدنيا وكنوزها مينجمش يداوو جروح غارقة وعميقة...تعلمت نحافظ على روحي وعلى صحتي  وحدي وفهمت الي راحتي النفسية فوق كل حد  وفوق كل إعتبار في الدنيا هذي ...

وليت نسمع برشة موزيكا ونكتب برشة وناكل اكثر من الازم وندلل روحي ونخاف عليها ونحميها ونداويلها جروحها وساعة ساعة نخرج نفرهدها ونعمل معاها كاس تاي منعنع  ونحتضنها ..

فهمت الي ضوضاء العائلة والحس والعياط هو هدوء للقلب ...
وسامحت الي بكاني وخلالي ندوب في قلبي ...
فهمت الي السماح قوة وفن نكتسبوه ...والي الهدوء وتجنب الصراخ في المواقف الصعيبة لصاحب العقل الراشد ...
وفهمت الي النجاعة وتحقيق الأحلام  والعلم هو السبيل لمحاربة الجهل والرجعية والتطرف والهمجية ...و هي الي تخليك عندك قيمة وقدر وتخليك إنسان بطابعك الخاص وسط ناس متشبهلكش ومتشبلهاش ...
فهمت الي العالم ميشبهش لبعضو ..وميقبلش حق الإختلاف والي العولمة فسدت كل ماهو جميل في الحياة ...وغلبت ماهو برغماتي مادي على حساب ماهو انساني اتيقي اخلاقي ...تعلمت نسكت لين سكوتي يتسمع ومنردش الفعل ...
فهمت وتعلمت وميهمنيش خسرت والا ربحت ...مفيد داويت جروحي ...

حسام حفيظ