جيت نلعب ياخي حصلت..
كي لأرنب في حجر الذيب..
جيت نعيش.. نتنفس.. نسرق لحظة من الدنيا..
تسرقت..
مشيت و ما رجعتش..
شطري قعد غادي.. قلبي قعد في بلاصتو..
بين شجرتين و مقابل البحر..
بين نسمة الليل و نجومو ضعت..
ظهري قعد مسنود علي هاك العود..
انا و هو زوز قعدنا وحدنا... 

ثالثنا...
ملايكة منزلة من السماء...
اطير بلا جوانح.. ضحكة تزعزع عرش الرب...
عينين تحكي في حكايات بسكات...
سرحت...
بخيالي.. ضعت و ضيعت...
مشيت و ما رجعت...
قلبي قعد معلق غادي.. ضحكت وقت الي لازم نبكي...
ضحكة بوجيعة بنينة...
نتلذذها بكل سادية...
ضحكت عالدنيا و الوقت المعكوس...
و حبيت...
حبيت الدنيا في تركينة من تراكنها...
بملايكة موش من الجنة اما منها...
نعاند...
موش فيك... اما فيا...
في قلبي الي مال و موش بيديا...
جيت..
علي بالي... سكنت الروح بعد خيالي...
سرحت فيا...
في عالمي و معالمي...
في عوالمي...
تسري... في جلدي.. في دمي...
يا فرحتي و همي...
همي...
كان الدنيا تعاود تسرقك مني...
و نخاف عليك...
موش من عين الناس...
اما كلمة وحلت في قلبي قبل عقلي...
و موشمة في الجواجي و ما فيها باس...
كي نتفكرك و ننسى جميع الناس...
علي اساس...
علي اساس شوفتك مازالت تخليني نحس..
ولا نرا بعينيا...
موش قتلك سكنتي...!
احتليتني...
فكيتني مني.. ليك...
قعدت غادي... بين ايديك...
مشيت...
هزيتني مني...
هزيت... كل شي و خليتلي خيال نعيش بيه...
خليتلي ضحكة... تبسيمة... نفرقها على ماشي و الي جاي...
ماكش ليا... ماكش متاعي... اما عايش و معشش فيا...
مبنها وجيعة...
تهونها عينيك الناعسين وقت الي طل عليا في عز منامي...
محلاها ضحكة... سكنت في احلامي...
تخليني نحب الدنيا بيك...
اتعّب و تقوي في نفس الوقت...
تعبني بعدك... و تقويني لحظة عشتها بيك...
نسيتني فيها في تعب سنين...
في وجيعة قلت عمرها ما تبرا...
طلعت انت وجيعتي الجديدة...
البنينة...
ما نحبهاش توفى...
نحب نعيش بيك حتي لو كنت ماكش ليا...
باش نكملها الثنية...
عازمة و عاقدتها النية...
قتلي فما حاجة باش تتبدل فيك...
اما مقتلكش...
راك بدلت كل حاجة فيا...
قررت نبدل كل الناس و نخليك كان انت ليا...
حبييت...
الدنيا بيك...
و شعليك...
ما تخممش عليا...
ثنيتي سطرتها بيديا... عمري ما باش نندم...
وقت الي تواتي باش نفكك منهم و نعيش لحظة...
و نحس الي انت ليا...
اااااه يا عشيري اش الي عملتو فيا...