بكلمة بدات...
هيا نهملو...
علي غفلة جات..
ضحكنا و قتلك بڨلا ليها يا عشير...
مشيت.. وما فيباليش باش نمشي و ما نرجعش..
ضحك و لعب و برشا شطيح...
رغم الريح قلت قلبي عمرو ما يميح...
ليلة.. موشمة في عمري.. و سنيني..
ملت.. وما فيباليش باش تمشي و تخليني...
ربحت بخسارة و انا الي ما نخسرش.. 

حيرت المدفون بين الظلوع..
حب قديم في ڨلب موجوع...
حبيتك و نسيت.. ولا خليني نقول تناسيت..
و بعد اكثر من عشرة سنين رخيت...
حنيت..
و تحيرت مواجعي...
بصوابعك...
حليت لمخبل في كبة...
بغزرة.. و تبسيمة... بعت الطرح...
شريت.. و بعت..
بعت الدنيا بناسها...
و نسيت روحي الي انا منها...
و لقيت روحي...
وحدي في ثنية مشيتها...
قعدلي خيالك..
مونسني...
و حتي الزمان ما ينسي..
اما الوجيعة تقسّي...
تحجّر الي كان ليّن..
تيبّـس الدم في العروڨ...
موش قتلك.! ڨلبي مخنوڨ !...
و انت النفس..
و بيك نحس..
نعــيش... نتعـاش..
ملّــت...
للشيرة الخطيرة..
وين الهفوف..
عطيت بظهري.. و ترميت..
و ما حسيــت...
كان كي قتلي..
فيـق يا بنيّـة مانيش متاعك.. ماكش ليّــا...
ما تحبنيش.. قلبي ماكش فيه..
كليت الكف... اما تعرف اش حسيت..!
بشماتة...
في روحي..
في ڨلبي الي حب من غير مشاورة...
تبننتها وجيعة.. بنارك تكويت..
و حسيتها الليعــة..
اش هالبييعة.. محلاها ضيعة..
ايا مشكي و عاود.. و بڨلا ليها...
ڨلبي و نعرفو ما يترباش...
و علاش.. باش يتربى..
و انا عليك ما نستغناش...
موش بالسيف.. بالكيف..
و الكفوف..
و بلي تحب..
انت السبب..
خاترك تتحب..

درصــاف الشبشوبي