نحب نختار طريقي وحدي..نحب نتمرد ونثور وتحرر ونتجرد من عيشة اني تخلقت باش نقرى باش نلقى خدمة ونعمل كرهبة ودار ومرأة وباعد يجو الصغار ويكبرو وانا نكبر ونموت ...منحبش عيشة منظمة روتينية تقتصر كان باش نتبع الاخرين ونعمل كيفهم ..نحب نعيش عيشة مفربكة مهبولة كل يوم منعرش شنوا يستنى فيا من برقرام ..نحب نخرج ونتفرهد ..نمشي نعمل قهوة في المدينة العربي مع صاحبي الي مشفتوش ليا مدة ..ونشوف الدنيا ..منحبش نلبس كستيم وكرافات مخنوق فيها وكرهبة اخر صيحة ولينات سينيي .. ونروح نتمد نتفرج في اخبار الثمنية والنشرة الجوية ونتلطخ نرقد لين يجي صباح ونرجع نخدم ...نحب نلبس الي يجي قدامي ..نحب نرقص في الشارع ونروح مخر ونقعد نخزر لزين القمرة في ليلة اربعطاش ..نحب كي نمشي للبحر منقعدش نخزر لهذاك وهذيك ..نحب نغزر كان للموجة ونقرى في كتاب ومعاي ترموس فيه قهيوة عربي مع كعبات حلو دياري ...نحب نخرج ونلبس الالوان ونضحك للناس ...ضحكة فرحة وضحكة حياة خالية من مشاكل وهموم ..

نحب نقعد في بال كل واحد يعاني ويتألم من الدنيا هذي ..نحبهم اكا الناس الضحاكة على الطول الوقت هكا الناس الفنانين ..الي كيف يتكلمو الفن يقطر من كلامهم في مشيتهم وفي لبسهم وفي هيتهم ..تحسهم ثائرين ومتمردين ومتحررين على العقول المربوطة الي بقات مسكرة من عهد الفراعنة...نحب كي نعرض بنية صغيرة نقعد نضحكلها ونغزر لغدودها وضحكتها المرسومة على فمها نحب كي نغزر لشمس عيوني تشعل وتبرق في ضوها ..محلاها عيشة الانسان الي وكل امرو لله وبقى يستنى في الفرج ..نحب الخيال ونحب الانتيكة والطبيعة والجبال والمغامرات ..منحبش عيشة مكبلة بأغلال الدنيا وبمشاكل العباد وبعقليات اذاكا معجبوتوش واذيك تحبني لازمني نتلافتلها ونعمل علاقة معها تقوم على النفاق والكذب والغدر والخمج الزايد ...نحب فكرة انو مزال طريقي مبداش.. مزاال طويل ..والي عشتوا لكل مجرد غمظة عين ..او غفوة ..مزالت نحب نعرف الدنيا اكثر ونعرف عباد محلاها وعقليات متفتحة ..نحب شكون يقلي محلاك ومذخمك ومفينك ..ومبن كلامك وطبيعتك .. نحب ها الاحاسيس وتشعرني اني نحب نزيد نعيش في ها الدنيا ولازم نخلي فيها اثر ..

منخرج منها كان عندي حجة انو انا تخلقت وثمرت وزرعت وردة حمراء الي يتعدى قدامها يشمها ويتضرب فيها الي يراها يقول يرحمو بو الي زرعها مزينها يزين ايامو ويحليها ..منحبش عيشة الحزن واني نغرس روحي واني نغرس روحي وسط زنزانة ظلمة نبكي على اطلال الحبيب وفقدانو ..والا نتغشش على  كلام النااس الي يقطعو في لحمي وياكلو فيه بالماء والملح الي ذاقوه مني ..منحبش النحيب على الماضي والخوف من المستقبل ..منحبش حد يسمعني كلمة توجعني ..بلعكس توا اكتشفت انو تخلقت باش نسايس روحي ونخاف عليها ونحترمها ونحبها ونداويها وتحضنها ونتلكمت عليها ونشفيها ..نحبها اكثر من الانسان الاخر ..خاتر تخلقت باش نجم وباش نحاول وباش نرسم ونكتب ونعبر وننحت ونشيخ خاطرها حياتي انا مهيش حياتهم هوما ..انا تخلقت باش نعيش كيما نحب ونشتهى ..نحب لحظة نعنق امي ونترمي في حظنها ونبوسها ..والا نمشي لدار الجدة وتبدى تخرفلي على حكايات الزمان وقت الي كان وقت السترة والسفساري والغنجة والحرام والخلخال ..والوشمة والحرقوص والحنة ..

نحب نعيش اكثر خاطر مريت شي والسنين الي تعدو ماهم شي ..بلعكس سنينهم هوما مزينة بعقليات الغير المسخة والمغززة ..توا حياتي انا وروحي انا بزيتني وبضحكتي وبطابعي الخاص القائم على الثورة والتمرد والحب وبرشا امل وتفائل بلي ربي ميخليها بحد..خاطر قطعت الرباط ونحيت سلاسل المجتمع وعاداتو وتقاليدو المخنوقة والضيقة ..خاتر انا نحب الوسع والانفتاح ونحب الطلاقة والحرية خاترها حياتي انا وروحي انا ونفسي انا.. توا  باش نثبت ذاتي اكثر وباش نثبت اني تخلقت وباش تبدى سفينتي تشق في البحر ..اما سفينة ربان قوي ومتمرد وثائر ..ربان باعد متلكع من الدنيا برى بالحب وبالقوة وقال بينو وبين روحو ..: تخلقت باش نعيش للاخر ونواجه كل شي بالايمان وبالصلاة وبالله ..توا باش نطيح ونقوم ونعمل دورة وعكلة..توا باش نتكسر ونتلم ..باش نحزن ونفرح ..باش نحب ونمره الوجود ونثور عليه ..توا باش نتفلسف وباش نرفض ونصد علي معجبنيش باش يتبدل على خاطري توا عيشتي انا برك ..وحياتي انا ..وانا حر اشنعمل

...حي على حياة المتحررين ..