حسيت الدنيا تضحكلي ، فرحانة بيا ومطيرتني ..من رزن وجعي مخففتني ..

مصورتلي لحظات جميلة تحفرو في الذاكرة ..صورتلي نساء بالسفساري ملتحفة متعدين و راكبين فوق الجحفة..

بحال النهار عرس يتبخترو في اللحرام والخرس ..يلمع في سطوع الشمس ..

تقدمت شوية والبهتة مالية عيناية نلقى مرأة مقدية قالولي اسمها القمرية ترقص وتميل بالملية التونسية بجنب كنتها و الي تتجلى باللبسة الحمامية على الطريقة التقليدية البدوية الي حبيناها خاصة مع ضرب الطبل والمزاودية..حنولها بالحنة القابسية ..وظربولها زغروطة ريفية من بلحوح المراة العربية..

بشوية بشوية كان ها النهير بالحركة والحماس نيير وحزن السنين مطير..على الخايب مزير ..

حسيت بالدنيا تبسمتلي بريحة السخاب والعنبر مفوحتني ..بالزينة الجميلة مزينتني ..بناسها وبطيبت قلوبهم محفلتني ..

ومنسيتني في الهموم الي مشات و الفرحةالي سكنتني و جات في الدموع الي شاحت ومشات من مخي تمحات وفي بلاصتوا تزرع الحب الي روى القلب ورتحو من التعب ..

.حسيت الدنيا ضحكتلي وجهى السمح ورتني وبيدها عنقتني ...حسيت بروحي فرحان متفتح كي زهرة الاقحوان في وسط الناااس ..