اقعد نحكيلك ونحدثتك على الايامات الي مشات وجات وعلى روحي في الحياة ..اقعد نحدثتك على طفولتي المسروقة وعلى التعب والصعوبات الي  مخزنهم داخلي . اقعد نعلمك كيفاش تخبي دمعتك وحرقتك وراء ضحكتك ..

ورراء كلامك البنين اما بالي تعمل وجهك يقعد ديما حزين وعنييك تغطس وتعوم في الانين ..تي لا علينا اما ايجى نصارحك بالي نحس بيه انا توا ..ونحيكلك على التفاصيل والسهران على ضوء القمرة في الليل ..ايجى نحدثك على روحي الكذابة ..روحي الي زعما قوية ومتتهدش ..روحي البسيطة الساذجة ..روحي الضحاكة المبتسمة في النهار والبكاية في الليل موش ضعف والا حاجة اما الحياة تضر والفقر يذل يخليك تعيش كالعبيد ..

يخليك تعيش محبوس ..مسجون محقور اما انسان قوي وعظيم حامد ربي بالي عطاه وراضي بالي كتبهولو .. ميسالش يصير على بونادم ايامات وتتعدى ولحظات وتتنسى..باش تقلي برى فرغ قلبك لشكون توا تتفرهد وتتحسن وبلكش تنسى وتصبر..لا يا راجل بلي تحكي وتقول مايفهمك حد..يقولوا زعما صغير وتوا يكبر ..توا ينسى الوجيعة الحزينة والحرمان من كل شيرة ..توا يوصل ويتمرمد..ويعمل قلب ويحس..

مزال مراى شيئ من الدنيا..مزاال غشير يرضع في صبعو ..يفرح بالحلوى ويبكي كي ياكلولوا قسمو من الشكلاطة... مزال يلعب كاري وغميظة..توا يعمل عقل و يحس ويحط في قلبو هذا هو الكلام الي تسمعوا هذا هو نفس الشريط يتعاود ويتكرر عاد العبد يقعد ساكت ويلعبها يضحك ويفرح..قتلكشي الي انا ممثل باهي..صرحتلكشي وقتلك الي انا ساذج و عنيد...هوما ميعرفوش انا باش نحس..ميعرفوش النار الي تاكل في قلبي وشاعلة ..مزالوا ما فاقوش بيا وبالدنيا الي عاملى فيا...مشلقوش بكا الضحكة المليانة ندوب ودموع..مزالوا ماإكتشفوش الحقيقةالي مخبيها عليهم...مزالوا ..اما لين يفيقوا هوما انا مزلت نقاوم ونكذب ونقول انا بخير ..انا سعيد وفارح ...انا ضحكتي تزعزع الاجبال ...مزلت نقاوم ونتنفس ..ونعدي فيها بضحكة وتبسيمة ..اما وهذا الكل متقولش ضعيف ومزال واحل في الحكايات اذوكم خاتر مقتلكش الي انا مزلت متهديتش..مزلت نتنفس بعمق ومزال قلبي ينبض باش يقاوم اكثر من الي سبق مزلت نحلم ونبكي ونضحك ونغرد ومزال عندي الامل ...خاتر ها الدنيا هذي  غدارة ..ساعات تتسكرلك وساعات تتفتحلك كالنورة..

تخليك كل يوم تحس بكا الشعور بالخنقة ..بالتقطيع ...البدن فاشل والمخ يخدم ليل مع نهار ...يخمم في كل شيئ وفي حتى شيئ ..يفكر

..يفكر في الماضي الي تعدى حزين وفي الايامات الي ذقنا حلوتها بوجع السكين ..كلام في القلب محصور ولا تبوح لحد وباعد يقلك تخرنين ...كل يوم نتعب رغم اني منعمل في شيئ..نتعب من روحي المزيفة ..

كي تهرب يعني تتحرر ..تكسر الحدود  ..تتنفس ...تاخذ هواء عميق وتشم ريحة الانتصار والتحقيق   تغلب روحك ..تعفس على الذل.. القهر..الحرمان  وتسكر  البيت الضلام المسكونة  بجروحك ..تخرخ من الي انت فيهوتخلي الفرحة مربوحك ... ..الحرية المفقودة في بلادنا توا انت تصنعها ..اي نعم انت الي تصنعها ..لان مثلنا التونسي يقول "النفس نفسك وانت طبيبها "