حاول تعيش المحبة

حاول تحب روحك وعودها على النسيان ...يزيها من الدوران والحرمان . نعرف الي هي تعيش معانات الفقير والعريان ..الزوالي والجيعان ..المحتاج والتعبان ..المحروم والبردان ..

اما تحب نقلك حاجة تراه جرب اخزر لبعيد وانسى ها السنين الي معبيا بالصديد ..ابعد على المنافق والي عامل روحو قوي كالحديد ..تراه جرب سافر بخيالك لبعيد ..

اقرى وتعلم عيش الدنيا ...ها الدنيا الي معبيا ذيوبة جيعانة ..

حاول تخلي الموسيقى قوية ،صاغبة وتفسخلك سنين منسية ..تخرجلك اكا المحبة المتخبية ..في داخلك مبنية .

حاول غمض عينيك واحلم بروحك طاير ..من بدك وعقلك حاير ..تمشي على جسر بالورد ساير ..ماشي لقدام و بالمستقبل المزيان داير ..من فرش الكبي واكا الحزن ثاير ..للامل والتفائل وللبسمة زاير ..

جرب سيب روحك خليها توريك الي هي تبدع وتكنز وسها برشا ...ترسم وتتالق تتطرز وتنسج ..اعطيها فرصة وفرصة اخرى ..

تراه جرب وانت مغمض عينيك تتخيل صغرك وبرائتك ...ضحكة ثغرك ..ولطافتك ..كان تجرب توا تلقاك تبتسم وحدك وحدك ..تصور في تصاوير قديمة..منحوتين وسط المدينة ..الي حافظهم بلاصة بلاصة كالحفوظات في الكراسة ...تكلمهم يجوك يجرو كالرصاصة..على خاترك انسان وتعشق المدينة والمكان ... تعشق الحرية والهروب والتحرر ... تعشق الحب لذا انسى التعب وخلي بلاصتو شكاير بالحب ...