حماة الحمى ياحماة الحمى ...هلموا هلموا لمجد الزمن

لقد صرخت في عروقنا الدما...نموت نموت ويحيا الوطن ...

انا وانت وناي ونا ونايا .. كلنا توانسة وتجمعنا الجنسية والجمهورية التونسية ..

نعيشو مع بعضنا في بلاد وحدة تعرف انها بلاد المؤسسات ..بلاد الاسلام ...بلاد الخير والبركة ...بلاد الحب والتعايش السلمي ! بلاد الرقي والنظافة والمحبة والاحترام ! بلاد للعيش الجماعي ..

وبالرجوع لواقعنا الراهن وباعد تخديم المخ ولينا نعيشو حوت ياكل حوت وقليل الجهد يموت ..ولينا على اعصابنا فادين ..قالقين ..العيشة مهيش عاجبتنا ..دنيا غالية وناس متكبرة عالية تخزر لطبقة الفقيرة من منظار صغير ! .. في تونس بلاد المؤسسات ولت الروح فيها كالذبانة ! وليت تمشي تتفرهد تموت ! تمشي تقرى باش تتعلم وتنهض ببلادك تموت ..وليت تمشي تشجع جمعيتك تموت ! .. وليت تخرج تسوق تتغدر وتتسرق ! وتتذل .. المراة ولت جنس ومتعة ! الرجل ولى مجرد الة للفلوس ! .. الثقافة نعرفوها في وسائل الاتصال .. ..نحنا امة اقرإ ولا تقرإ.. نحنا ولينا نجرو وراء الدنيا ! ...

الروح في تونس صغار شأنها وطاح قدرها ! النفس البشرية الي لازم نحترموها ولت تموت في نهار الاف المرات ! .. الحياة نعرفو عليها انها تحيا وتعيش وتحلم وتبدل اما الحياة في تونس ولت موت ! وقتل ! وفتك واغتصاب ..وواد بلاع للبشر ! .. الحياة في تونس ولت شبه منعدمة ! ولت توجع برشا ..خنقة وفدة وقلق وروتين وكل يوم غريبة جديدة ! حدث جديد ! محزن وتعيس ...!

في هاو صغار الكردونة .. في نساء ميتين بالكميونة ..في عمر ولد الافريقي ..في وردة تحب تقرأ وماتت غارقة بالماء في الواد ..في هاو ادم والخرجة الي جرت لموتو ! وتنجم زادة تخرح من دارك باش تتفرهد تموت وتخسرك امك وتخلي دموعها تجري !!!!

الشابي قال : اذا الشعب يوما اراد الحياة ..فلا بد ان يستجيب القدر ! ..

ولا بد لليل ان ينجلي ولا بد للقيد ان ينكسر ! ..

عام محزن ! تعدى ..وبرشا ارواح خسرو الحياة ... وبرشا امهات تشوشطت وتحرقت وتعذبت .. وتليعت على افلاذ اكبادها ! .. تاريخ مهوش باش يتنسى من الذاكرة .. تاريخ باش يقعد محفور في في قلب تونس !!!!! ..الدنيا غدارة والموت قريب واغدر منها .. سامحو بعضكم واقبلو المختلف واقبلو على الحياة ...ميساالش اتعبو وفدو وابكو ووهدو اما قومو وجاهدو حياتنا صعيبة وحبلها وسع البال

اعيوولهم بالرحمة ..

في قلب يبقو وذاكرة يتسجنو ..