وانت صغيرة في المكتب ضحكو عليك خاطرك ضعيفة...سمينة...قصيرة برشا ولا طويلة..

في الليسي البنات اندادك تحب و تتحب...الكلام المعسول ليهم وانت تتسب...

في الليل تبات دموعك عالمخدة...تتمنى تعيش كيفهم وماطالبة في حياتك كان السلام و المحبة...

تمسح دموعك و ترسم ضحكة طمن بيها قلب أمك...اللي تعرف ورا تبسيمتك الكذابة مخبية شقاك و همك...

تخرج للشارع و تتعاود الحكاية...تكتم و تخبي لا يقولوا فوق عوار بدنها معقدة و بكاية...

تكبر بغصة في حلقك...و سؤال ما يفارق عقلك...

علاش ربي خلقني هكة من دون الناس...علاش لا عندي زين محليني لا يواتيني مهما لبست لباس...

علاش مانيش كيفها العينين عليها...علاش يجريو وراها ويفناو فيها...

علاش هي موش أنا...وعلاش نتحاسب و انا انسانة...

موش بيدي خلقة ربي...وما سمعني حد قلبي معبي...

علاش للزين عملوا ميزان...للبدن قياس و للعينين و لون الشعر ألوان...

واللي موش كيفهم يعيش عليهم عالة و معاهم غريب...و كلامهم المرزي كيف يشوفوك ديما حاضر ما يغيب...

حكموا عليك بالموت خاطرك انت مش كيما يحبوا هوما...نساو اللي ربي اللي خلقك و صورك في احسن صورة يجي نهار يخلص منهم شر أعمالهم المشومة...