تغيب عليّا و ما تكلّمنيش 10 و لاّ 20 شهر تسافر جمعتين و نحسّهم عمر.. نقول نساني و نسّاتو فيّا الدّنيا , نسى العشرة و حب سنين و أيّام و سهر ليالي و حكايات يشبهو للأفلام .. تغيب عليّا و نقول معادش ندور بيه لا نكلمو و لا نصافيه كيما رماني نرميه ورا النجوم نعلقو و نخلّيه عقاب على دموعي إلي شاحت و أنا نستنى فيه و ما نجّمش ...

نضيع بلا بيك اسمك على طرف لساني و إلي قدّامي باسمك انّاديه , وين ندور نلقاك حتّى في مرايتي نرى خيالك في عينيّا و شفافك على شفافي , تصويرتك ورايا و حمّيري على خدّك , نراك تضحك , نراك في كتبتي .. في حبار ستيلويا إلّي ما يكتب كان عليك , في كل بلاصة ضايعة في الدّنيا و فيك .

تغيب عليّا و تبكّي عينيّا نحلم بيك مع غيري تقول في نفس الكلام و يوسوس مخّي و نحس بوجايع أيّام زمان نحس بالحقيقة .. حقيقة الأحلام إلّي مش ديما تصير , حقيقة الدّنيا و العقل و القلب و تأثير الغير و الغياب .. نرى كل كلمة قلتهالي كل نحبّك , كل خزرة , كل غيرة بمعزّة كل شدّت يدين و أفعال يرضى عليها القلب و تعلى في العين : منغير ما نشعر ملّي كنت نشك فيك ننسى و نتخيّل الحاجات أذوكم يتسرسبو منّك لغيري بعد ما كانو ليّا و بيني  و بينك شكّي فيك مهوش شك بالعكس فعل في بلاصتو انتي سنستني كي ما تلقانيش تعوّضني بغيري , عوّدتني كي تغيب ما نبكيش خاطر عذابي يفرحك و لازم نوريك إلي أنا أقوي منّو ...

بيني و بينك الشّك عمرو ما يبعد , ورا غيابك فمّا حكايات ما نعرفهمش و ورا كلامك فمّا حاجات لازمني ما نصدّقهمش .. و ورا حكايتنا بالذّات فمّا حاجات مازلت ما فهمتهمش و انت باقي تحضر و تغيب , تعيّشني فالعسل و تتبخّر , تنساني ليالي و في لحظة تحظر تقول توحّشتني و فجأة تعاود تنساني تهزني من بر الحزن تفيّض فيّا الأمل و تغيب بعد ما تقدّملي الحزن هديّة ..

تغيب عليّا و ما يرضّيني منّك شي لا كادو و لا بوسة ولا تعنيقة لصدرك لحنين .. كلّو ما عندو حتّى منفعة كلّو تمسّخ بالغبار و أنا وليت نفهمك تعملهم باش تسكّتني و تبرولني نعمل روحي صدّقتك وأنا مالغش نغلي أما ما نجّمش نتغشش عليك مهما كان طلبان السماح فاشل  ما نجّمش نبرد عليك بسهولة ما نجّمش نرفضلك حاجات تحبهم أما من قلّة الاهتمام كرهتك... و كان جا كلام الحب و حبّك ليّا صحيح عمرك ما تغيب و لا تورّني برود قلبك و لا الثلج إلى داير بمشاعرك