في كل لحظة نحب نحاول نحلم اني طرت من بدني المعفن ..بدني السجن ..الحبس ...القفص المكسر الي ساجن روح حزينة ، مجروحة ، روح مكسورة ومحرومة ..نحب نخرج ومنيش منجم ..نحب نهد الهدود ونخلي دموعي تسيل على الخدود ..نلبس ونتزين باش نتخبى وراء الجرود ..نتخبى من عين الحاسد والحاسود ..

في كل لحظة نخلي عينية تحكي عليا ..تعبر على حالتي ...ترسم في داخلي ...تصور وتنحت في صورتي ..علمتها انها تحب وتتحب ..علمتها تنسى الوجيعة المعبية بالتعب ..علمت روحي القوة ..موش قوة بالاسم انما قوة بالفعل ..علمتها تذوق المر تمشي حافية فوق الجمر ..علمتها على قد ما تصبر تنال..وعلى قد ما تنسى باش يفرج الحال ..علمتها تحط ملح على الجرح..تعفس على قلبها وتقدم ..تصدم وتكافح..تناضل كل شيئ عارضها ..تحارب كل شيئ ساكنها ..يعذب في داخلها ..ويجرح في مشاعرها ..ويحطم في حلمتها ...

تعلمت بمرور الوقت كيما انا قوي لازم غيري يقوى ..يقدم ويسعى لتحقيق التقوى ..يدفن الجروح في صندوق ويخبيه ..يعفس عليه وينساه ..تعلمت نعمل الباهي ..باش خاطري يولي زاهي ..للفرحة والضحكة شاهي ..نصنع حلمتي من جديد..نكسر عليها الحجر ونلوي الحديد..تعلمت نعيش ونتنفس ..نتحرر من كل العوائق الي كانت حبستني ..وحارمتني ..حارمتني من النجاح ..من النفس ..من دمعة العين ..من ضحكة الخدين...حارمتني من اني نكمل نحلم ..ونطير كالغشير الصغير .. الصعوبات هذي كانت حارمتني.. اما لوقتاش باش تقعد حارمتني؟؟ وانا الي نجمت نهرب ونسكر السلاسل ونولج للفن وحب الحياة ونجرج من العفن ..نخرج ونعيط بالقوي وسط الناس ونقول ..."حي على الحياة " "ان للفن وان اليه لعاشقون "

"اذا الشعب يوما اراد الحياة

فلابد ان يستجيب القدر "

"ولابد لليل ان ينجلي

ولابد للقيد ان ينكسر "