كلام يجيب كلام و خاطر يجيب خاطر و ما أحلاها الماخذة بالخواطر ..نهار يمشي و نهار يجي و كل قديم هو الجديد .. كان العمر يمشي و يزيد..نمشيو و الدنيا سابقتنا .. نجريو ما نلحقو أما ديما الفرحة ألي نصنعوها في نفوسنا مزهيتنا منسيتنا عوج إلي في ثنيتنا...

في طريقك تنجم تعرضك برشا حاجات كيما أقارب في داخلهم عقارب , كيما أصحاب  يشبهو للسحاب.. كيما الحاج إلي عطا حق ربي و نسا حق عبادو , كيما المعلم إلي حايل عليك باش ولدو جاء الأول و هوكا اليوم مصتّك, كيما مرأة متغنبزة تحت التخليلة تقلك سلم على أمك أما شكوني الله أعلم ! كيما جارك إلي ما يسلم عليك كان عندو قضيّة ..

من اللخر الدنيا دروس فيها الباهي و فيها النّزوس  .. الحاصيلو هذا كلام قلقت قلت نحكيه مع ناس لا تعرفني لا نعرفها بأنقص حس و بأزيد حكاية ,, حكاية و حكايات خير من قعدة و برشا فدّات