ملي تخلقت وحليت عيني في دنيا ونا نعاني فيها بمشاكلها وبصعوباتها وبتقلباتها وباظطراباتها ..هو عندك الحق تسالني نا شكون ومن انى جنس واصلي وفصلي ...

يا سيدي غالي وطلب على الرخيص  نا ايسم ولد 12سنة يقولو عليا اني بطل ومغامر ومنتصر خاترني نعتبر من احد مرضى السرطان ..في لحقيقة منعرفش معناه ولا تعريف متاعو ولا شيئ منه نعرف كان فعلو الدوني ونعرف زادة عليه    سارق ومحتال.. تعرف علاش خاترو كان عند شعر مزيان اسود راقد فيه الليل سرقو شعرة شعرة ..وموش كان شعري حتى من شهواتي المتعددة الي نمرج بيهم امي الحنينة  سرقهملي هو حتى امي سرقهالي ..

اي نعم امي تصارعت معاه ها الوحش السارق  فيبالها قوية وباش تهدو اما هو هدها وهزهى مني بالغصب .. ومن وقتها ونا قايم بخواتي الصغار هاوينو تكفلت بيهم وترأست مهمتهم ومصروف قرايتهم ونسعى باش نحققلهم حلمتهم ..كنت كل يوم نفيق على صوت اذان الفجر ..نجبد سجادتي ونصلي برشا دعوات تتقال في قلبي المريض ..  باعد نحضر فطور اولادي ونقصد ربي للخدمة ..لحقيقة عرفي في خدمة مهوش يحرث عليا  برشا خاترو يقرب لراجل كنت نعيطلو بابا باعد  الي هو بيدو تلهوثت عليه بنت حلال وهزاتو يسكن معاها في دراهم باعد الي كتبلها لملمى والي ثمى ومسحتلنا افمانا بالاحرش وشربتنا من ماء البحر ..

وكيف نروح في النصف متاع النهار المشية المرخية والمدهقلة منعرفهاش ظليني طاير نجري بالجري نلقى صغايرتي يستنو فيا ويشيعو في عيوناتهم منظهرش ليهم قدانيش تاعب ..ومهرس ومتدمر ..منظهرش ليهم قداش نبكي وقداش ندعي كيف نصلي وقداش نهز في ايدايا للعالي ربي باش يخرجنا من المحنة الي نا فيها .. قداش كذبت عليهم وقتلهم ماني كبرت هذاك علاش شعري نسل ..وجهي اصفر خاتر الشمس تصفر الوجه ..ظعفت برشا خاتر نتبع في حمية  باش نضعف..اما هذا الكل كذب في كذب ..هذا لكل هموم الدنيا قصتلي ضهرلي لزوز رغم صغر سني ..والدنيا مرحمتش صغير ضعيف ومريض ...مرحمتش يتيم متشرد بين الخبابل وضايع وسط الخيوط المشربكة والهموم المفبركة ..

وليت همي الكل مصروف اخواتي وتربيتهم وقرايتهم وليت الي حبيت يصيرلي ليا نا جميل في طريقي نحب  نوفرو ليهم هوما ونحرم روحي حتى من الحربوشة  ..

حتى صحتي رغملي تضعف بالايامات وبدني يذوب كيف الشمعة بين السعات منتبهتش ومنيش مركز مع روحي جملى رغملي اعظامي تفتفتت وتحللت وتجردت لاجزاء الاجزاء ...نحس بشوك داخلي ..

منرقدش الليل كان دقايق قليلة ..ومنكلش الماكلة كان لقمات صغيرة ..

وفي نهار مشمس نتذكر طلعاتو الكل نحس في روحي ضعفت ودنيا دارت بيا دور لين سوادت قدامي  وليت نشوف كان في ضباب ابيض هابط من سماء ومهبط معاه ملايكة لابسة لابيض وحجاب طويل للركبة يتدلى ..المنظر يشبه لامي وزدت تاكدت كيف كلمتني قتلي توحشتك ولدي وتوحشت عينيك وضحكتك وكلامك ...قتلي هيا وغنتلي غنايتي الي كنت ما نرقد الا بيها وهي تقول :قد لمعت عيناه

بالعزم انتفضت يمناه في هدوء الليل

من هو الصامد المغامر في وجه السيل

يبعد عن عينيه الراحة يتحدى خصما في الساحة يرمي ويصيب الاهداف يسعى دوما لتحقيق الانصاف

وخيال ابيه في الاحلام يوقظ في القلب الحساس حب الخير لكل الناس مهما كان الثمن من الصعاب سيظل البطل القناص بكل الصبر والاخلاص يعمل باجتهاد وعلى اهبة الاستعداد يرمي ويصيب الاهداف يسعى دووما للانصاف...