منعرش الدنيا شنوا مخبيتلنا

اما نحب نسامح الناس الكل ..الناس الي جاء نهار ووجعوني ..الناس الي جاء نهار وكرهت فيه روحي وعفتها واحتقرتها خاطرني إنساني بالقيم اذيكا ..

زادة حبيت نسامح روحي على برشة غلطات عملتهم ومخذيتش بخاطر روحي في بعض المرات ..

نحب نطلب السماح من ربي خاطر حسيت اني مقصر معاه ومنيش متزن وملتزم ..نتلون بين الالوهية والطريق الصحيح وبين الانحدار لطريق الحيوانية والمتعة والشيخة ...

نحب نطلب السماح كذالك من الدنيا خاطر جات فترة وكرهتها ولعنتها الف لعنة خاطر مكانتش معاي باهية ..

نطلب السماح من عايلتي ومن بابا وامي كان جات لحظة هزيت عليهم صوتي والا سمعتهم كلمة موذية ..

نحب نطلب السماح زادة من اصحابي خاطرني انسان مزاجي نحب ونبكي ونحس ونهز وننفض ونسكت ..

نطلب السماح من اعز صديق عندي كان نهار وجعتو بكلمة ودڨيت في عروڨو كلمة ڨعدت لتوا محفورة في مخو ..

نطلب السماح من الناس الكل حتى لو كنت أنا مظلوم مفيد نرتاح على قاعدة صحيحة وڨلبي يفرغ ومعاد نفكر في حد والا نشد البغض لحد