يلا يلا فيسع الناس الكل في بلايصها ..مدام شهرزاد حاضرة ؟ وي جيست 2 دقايق و انجي ..فيسع يعيشك 5 دقايق و نطلعو عالسان ..باهي اوكي ..قلبي يدق نرعش هكا كل ما نبدا طالعة انغني قبل ما نوصل للمسرح وقفت تنفست غمضت عينيا شديت الميكرو و طلعت ..

تصفيق ضو برشا ناس رجال نسا صغار كبار ..بديت انغني ..كي نغني ننسا روحي ننسا انا شكون ننسا الجمهور نشيخ انطير صوتي يطلع لسما ربي عطاني صوت مش عند برشا عباد ما نعرفش هالصوت كانلي في حياتي نعمة ولا نقمة ..كيف كنت صغيرة و انجي انغني يسكتوني يزي مالحس كسرتلنا ريوسنا ..نسكت و نتخبى في تركينة و نبكي ..

لتوا ما نسيتش قلبي مازال معبي عليهم ..نفيق على صوت الجمهور عالتصفيق يتعداو ساعتين ثلاثة توفا الحفلة نهبط نجري عارقة مالبروجيكتور ندخل لبيتي تجيني المساعدة ..مدام شهرزاد تبارك الله عليك كالعادة حفلتها..مرسي امل يعيشك ..نبدل دبشي و انزيد انعاود مكياجي اه مالة فنانة لازمني ديمة حاضرة نخرج يعرضوني الصحافة بالاسئلة متاعهم اللي ستانست بيها نجاوب فيسع نحاول نضحك و نتبسم في وجوه الناس الكل ملا دومان و ملا نيفاق لكلها في وجهك تضحك و تبوس و بعد كي تجي فيك الضربة حد ما يراتيك ..

روحت وصلت لداري .دخلت دار ظلام انادي ..فاطمة ..يا فاطمة ..تي شبيني فاطمة روحت مالعشية ..هذي لمرا اللي تعاون فيا فالدار سي نورمال بش تروح عندها دارها و عايلتها و صغارها كيفي انا عايشة وحدي داري كبيرة فيها كل شي اما مش دافية باردة فارغة نحكي وحدي و الحيوط ترد عليا اصل عمري ما عرفت طعمة العيشة في عايلة في حياتي خلي هكا خير ظ.شعلت الضو دخلت لبيت النوم قعدت قدام لمراية بديت انحي فالمكياج إييه مله راحة نحي عليا هالفوندوتان روج ا لافر احمر شوافر مركبين ..اي وجعوني لونتي ضوافر مركبين بفففف قداش وليت بكلي مركبة حتى اسمي بدلوهولي اول ما دخلت فالدومان قالولي اسم خديجة اسم مش فني و سماوني شهرزاد...