كلامي ليك و عليك
خاطر  ما نسيتش
و مانسيتكش ،
ما  ستانستش على عيشة بلاش بيك
، ستانست نعيش بيك في خيالي و برّه ،
تعوّدت نعنق التصاور
و نتهد   نكمّل ..
كلامي ليك وعليك
نلوج عليك بين كل تركينة من تراكن روحي 

نخفف وجايعي
نحب ننسى
اما اني ما نسيتش
لون السماء في عينيك
نحب ننسى
أما اني ما نسيتش
اخترعتك في خيالي ومريتكش
و ريحتك مغلغلة في جاشي و ما حسيتكش
توحشتك  
لين ريتك وزاد الوحش
شتهيتك
شتهيت تعنيقتك
شهوة طفلة فرحانة بعروسة العيد
نحب ننسى
أما اني منسيتش
،خايفة نقدم
نلقى روحي  نوخر
حروف بلا مهرب
وحلتهم تكبل تهد
تعبى الجاش وحروفي فاضت
ما دريت كان الوحش عليا طغى
وحق الرب، توحشت ريحتك،
توحشتك
حب وتعب
تهديت وقلبي تهد
اني ما يهدني كان تخمامي فيك الزايد
توحشتك
توحشت نحبك
نحب ننسى
أما اني منسيتش
منسيتش
بقيت بين الفرحة و كلامك
بين تخلويضي و صوابك
بين دخاني و عينيك
منسيتش و حق الرب،
الماضي الي راح وفات
بيه روحي ذبلت تنسات
الهواء يخنڨ ما يرويش
بلاش ريحتك  
حس التخمام في راسي
عقاب الليالي يواسي
حرقة سيقارو في تراكن
غير التراكن الي كانت فيا تواسي