قُلْ ما تشاء .. قائلٌ لَكَ في الذّمِ طَرَبُ

قُلْ  مساكين قُلْ لَحَّاسين قُلْ عَرَبُ

قُلْ عَرَبُ ... قُلْ لأقاصي الذُّلِ قد كَرَبُوا

قُلْ عَرَبُ ... قُلْ بَاعُوا أراضيهم وفي أراضي الناس سَرَبُوا

طفيتهم مبارح ومن وقتها وأنا مخي سارح ... إشيييييه  محلاها العشرين ...غدوة تاكلني العينين ... كمل البدن وبان  على الوجه الزين ... غدوة نلبس تلون ونحمر الخدين... غدوة الدنيا تعطيني الفيزا ونولي نصول ونجول ونعبي بالفرح الفليزا ... غدوة نولي مرية وفي دنية الكبار نشد ثنية ... غدوة تتحلي البيبان وحد ما عاد يعمل عليا مزية ... و- إلي كنت نموت بقلبي كي نراه بعينيا باش يولي قدامي وبن ايديا ... غدوة نحب ونتحب ... غدوة نبصم ونصحح وننتخب ... محلاها العشرين ...

غدوة ولا إليوما وإليوما ذقت الحب ... الحب إلي فرغ قلوب وملا كتب...  حبيت و بلاش حساب عطيت ... حبيت وبنيت مالحب قصور ما رضيتش بديار و العقل إلي جملتو في عشرين سنا طار... حبيتو وقلت بلاش بيه منعمر دار ... غيروا محلا في عيني حد ... خترنا الدار وسمينا الصغار وهرب وقت الجد ...

Nadia El Ouni - نادية العوني

سبحتها في يدها وفمها تمتام عيناها سارحة أما مخها خدّام ... بنت منجية إلي عرضتني في الثنية ولا إنصاف بنت للَّاتهم حتى هكي مش دونية أما للاتهم ماضية وموذِيَّة ومنجية حدها حد روحا مرا زوّالية ... إيه إما إنصاف بَيْضه وعيناها شهل وبنت منجية بحال فما عين متراش باها بالكل... لَمْكِنْتِي أمي الله يرحمها كانت تقلي ما يعمى مومن كان ما قلبو يمِل ...


بنت منجية حاذقة ومڨدية ريحة طعامها يجيب لاخر الثنية ... في عرس خوها هي إلي حلت قصعة البقلاوة ... وهي بقلاوة!! ... لتوى مطعمها بين سنايا ... كي نِفْست هادية بنت بكِير هي إلي قامت بها وعملتلها البسيسة والزرير ... وهو زرير !!!

للسمراء إلي ما تخاف لا شمس ولا صقيع ،على طول العام خدّامة لا ترتاح لا صيف ولا ربيع ،على قوتها جرّاية و عرقها سيول ،لا ستانست بمغرفة ذهب تقْتات ولا ركبت خيول،الهم والغم ضاقت أنواع وألوان ، لا شكات لا بكات غيظها تفشُّو في كعبة لوبان.


للشقراء الغنّوشة إلي للموضة تبّاعة، بكيفها تشريك وبهواها بيّاعة، مستانسة بالعز والخير طابع فاها، متوسْدة الحرير وبغير الذهب ما تشراها، بالها مرتاح تاركة الهموم لمَّالاها.

ــ ماما ماما شكون الغنوشي ؟ من بكري بابا يسب فيه وعم حامد عطار الحومة مايشهّد إلا بيه ؟ آآه هذا إلي جا لتونس بش يعمل سنِّيه ؟ خالتي خديجة تقول فيه وعليه هي ما كانتش تحبوا راو إما قالت ولاّ أبرك كي بدّل سنِّيه ! تعرف ماما ؟ يشبّه للطفي ولد حلّومة عرفتو هاك إلي مماتي كانت تعيطلو باندي الحومة. حلّومة قالت كبر وكي جاب الذْرِّي عمل عقل مسيكنة راسو شاب وما فقدتش فيه الامل

!
ماما متقلهاش بربي ... أما راو عم حامد العطار فاق بيه يسرق إكنهار قلي سِكتْ ما بيتش نفرّغ على ميمْتو الدار ! ماما ياخي مش مشى للحج كلعام جابلنا البخور واللوبان والفرادي على كل ألوان ! حلّومة على ما فرحت أما فرحها ما دام !