ماعادش نجم نقعد ساكتا و نتفرج ...

مانيش شنحكي من منظور طبي بما إنو ماهوش domeni و مانيش مؤهلة باش نفتي فيه .. و إنما شنحكي من منظور علمي بحت (mathematique)قايم عالأرقام و النسب و شويا analyse والناس إلي تعرفني تعرف إلي هو domeni و مانيش نحكي من فراغ ! هذاكا علاش شنحاول نحكي بلوغا ساهلا باش الناس الكل تفهمني و نوصللهم بالفلاقي هول المصيبة ..

ببساطة ، الشعب التونسي كي يسمع إلي عنا 24 حالة مصابة في تونس (إلى حد اللحظة هاذي ) يقلك إيه!؟ و شنوا تجي 24 حالا بحذا 12 مليون.. حتى شي! و ما يحسش بخطورة الوضع !
شد عندك ملا :

مشكلتنا في تونس الي احنا شعب مقسوم على زوز فئات : ناس واعيا و ناس ابعد ما يكون عالوعي و مهمتها الوحيدة في الحياة تميع القضية مهما تكون هول المصيبة .. !!! و في هالنهارين ظهر بالكاشف الي هالفئة الثانيا منتشرا بيناتنا اكثر مال CORONA في حد ذاتها ! و الي قلة وعيهم و تملصهم مالمسؤولية اخطر مالفيروس ! ابسط حاجا ،حتى كي تبدا حامي روحك و واخذ حذرك ، فجاة و بدون سابق انذار ! ترى احد هالكائنات هابط عليك و يلطخ فيك بزوز بوسات (اقل حاجا) قال شنوا باش يسلم عليك و قاعد اعبرلك على شوقوا للقاءك ! و كي تجي تحكي معاه يا اما يتغشش و لا يقلك الجملا الشهيرا " تحكي بجدك خايفا ؟"....ايه يا سيدي لكلنا لازم نخافوا حتى كان مش على رواحنا ( بما انو مناعتنا كشباب تنجم نوعا ما تقاوم ) اما لازمنا نخافو علي معانا :اماتنا اباتنا جداتنا حتى جارك اك الراجل لكبير الي عايش وحدو و ساعا ساعا تمشي اطل عليه و تشوف ناقصتوش حاجا من واجبك باش تخاف عليه....