المخ تحرق من كثر التخمام كيفو كيف امبوبة بيتي اللي في كل مرة تتحرق و تخليني في ضلام..

العقل سارح و الفكر شريد و العينين في سقف مرشوقين لا ترا فيهم دموع ولا هما فرحانين...

الفم ساكت و القلب يحكي والروح تنين..

لاعرفت نقدم ولا عرفت نرجع خطوتين.. احلامي في سما معلقين بدموع العين مغلفين ...

اي انا انانية

ونفتخر زادة تحبوا تعرفوا علاه؟!!

خاطر كي تكون اناني تحمي روحك من برشة مشاكل انت في غنى عنها .

انانية يعني ما نلحسش للعباد باش يحبوني..

يقولو في العمر هذا تبدي تبني في شخصيتك الصحيحة وتقرب لروحك اكثر و اكثر وتبدي تتعرف علي روحك بشوية بشوية وتعرف روحك شنوة تحب و شنوة تكره اش باش تخليةمن روحك لقديمة وشنوة تنحي وشنوة تزيد واش لازمك تبدل..

بديت بشوية بشوية نرا في روحي في مرا جديدة اللي بدات تتخلي علي الطفلة الصغيرة القديمة اللي كرهتها و ملت منها طفلة صغيرة ضعيفة ما تعرش شنوة تحب لا عندها طموح لا مستقبل لا شي يفرح ، طفلة صغيرة عايشة في دوامة ضعيفة الشخصية  الكل يحكم فيها كلمة تهز و كلمة تجيب ، كيفها كيف دودة القز باش تستخرج الحرير يلزم تموت الدودة  وفعلا بدات تموت اك طفلة الضعيفة المسكينة وبدات تخرج منها مرا جديدة شامخة مرا يا جبل ما يهزك ريح مرا قوية رغم كل الحب اللي في جوفها قوية بكلمتها و ضحكتها ،