وينك؛ إيجا نلعبو مرة أخرة و نعاود نربحك. مانيش حاسة بروحي ربحت. تطلعش خلّيتني نربح بالعاني! ماني نعرفكم إنتوما لولاد، تخلّيونا نربحو باش ما نحسوش رواحنا ما نعرفوش نلعبو .. أما إيجا نعاودو الجرية و شوف، قتلك راني ملاعبية.

-مادموازال، يا مادموازال باش نسَكْرو، السيّد اللّي كان مقابلك و الجماعة اللّي معاه خرجو عندهم برشة، و شربك خالص.

-كان تحب أرجع غدوة يمكن تلقاه.

-نرجع؟! هو أنا مزلت نرجع! لو كان نرجع و نلقاه إلّا ما نحرقو، ندفنو بالولعة متاع الشيشة على العملة إلّي عملها فيّا اليوم! و أنا كالبهيمة صدّقتو، قلّي نلعب معاك الطرح للخر واللّي يخسر يخلّص .. ههه يا والله أحوال ... مالا قتلي شربي خالص، شكون خلّص؟

-هو مادموازال، هو اللّي خلّص كل شيْ...

-معناها أنا ربحت

-لا إنت ماكنتش تلعب ضدّو، إنتوما الزّوز كنتو تلعبو مع بعضكم.

-مالا ضد شكون كنّا نلعبو؟ و شكون ربح و شكون خسر؟؟

-الدّنيا و الحب مادموازال، الدّنيا و الحب فرشو عليكم.