Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

هو درس

experiences-vie-amourSarah Messaoudi - ساره المسعودي

وبرا كان حبيت..

وتليعت وبكيت..

وبرا كان خانوك.. باعوك.. بدلوك.. ونساووك..

وبرا كان كبشت بإيديك في حاجه تعرفها مالأول مش ليك..

وبرا كان كليتها في عظامك..

بعد ما مشمشولك لحمك عباد تسخايلهم إماليك..

وبرا كان تكويت..

ولا عفست عالجمره وتعديت..

برا كان تحرقت..

وبرا كان حسيت بالذل والقل..

برا كان دمعت عينيك..

وندبت خديك..

وصحت ودعيت..

وقطعت شعرك..

ورجعت بكيت..

برا كان توجعت لين سال الدم..

وزاد في قلبك الهم..

وفضفض قلمك وبعد ندم..

برا كان تقهرت..

ومشى في بالك تحطمت..

والدنيا ولات كي السماء بلاش نجوم..

آش عليه كان عشت شويا دراما وسمعت غنايه مزموم..

وعملت حاجات متع أفلام.. وبنيت برشا أحلام..

باش تقدم لقدام..

وشديت الثنيه ومن شطرها رجعت..

هو درس.. كيفهم الكل.. يمكن حتى أهم..

ما توصل تحب روحك أكثر..

كان بعد ما تجربهم الكل.

ساره المسعودي

Sarah Messaoudi - ساره المسعودي
Save هو درس