سكنتو قلبي وعينيّ وتمنيتو يبقى ليّا..

هو زاده يمكن يكون حبني خاطرو دللني ووثق فيّ.. سمّعني وحكالي برشا حكايات نسيتهم شنيا..

معاه أيامي الكل كانت أعياد.. وفي عيد ميلادي عادهولي أحلى الأعياد.. زاد هدالي شكلاطه كيما نحبها كانت مابنها.. ههههه وزيد الهامل كتبلي علاها بارود..

أنا اللّي وجعتي وجعتو وضحكتي محسوب ضحكتو.. كان بكيت يمسحلي دموعي وكان تغششت بكلمه يرضيني..

أنا اللّي نضيع عندو وبلا بيه..

اللّي نبقى نتشعبطلو ساعه باش نوصل نعطيه بوسه على خدّو!

صارحني و ما كذبش عليا.. أيه قالي يا ساره راني خايب وكلب وساقط والعيوب لكل فيّا.. نلعب ونعدي وقيت وماعنديش غالي..

سألتو: ساقط معايا؟؟ قالي والله لا.. معاك إنت والله لا.. يا ولدي ساقط معايا؟؟ والله لاني ساقط معاك..

تي زيد ثبت روحك يعيشك.. يا ساره مانيش ساقط معاك.. إنت غيرهم.. إنت ماكش متع حد إنت متع ساقط..

عشت معاه أيامات حلوه ولات ذكريات.. حبيت معاه البحر وكرهت بعدو البحر.. تي كرهت حتّى ماء السباله!!

حكايتنا غريبه ومهبوله.. هو مهبول وأنا بيه هبلت ووحلنا غادي.. عملنا كل شيء وكل شيء عنا عـــــادي!!

قالي عليك الأمان.. قتلو ما نحبش يجي نهار من عينيك نهبط ونطيح مهما صار.. قالي أسكت تعاود هالكلام نتغشش عليك.. نعرف البنات شنو وإنت شنو..

المشكله اللّي أنا بعدو عرفت إلي هو كي هو وهوما.. ومهبولي طلع خوان كي ولاد بلادي الكل..

قالي كان يجي نهار وكل حد على روحو نحبك تتهنى.. ما نوصلكش بحتّى كلمه..

وبعد جمعه بركا ملي بعدنا.. لقيتو ورايا يضرب فيا.. ملا كلام حكاه عليا.. كلام ماهو كلام..  أنا شنيه؟ أنا خشمي مهزوز للسماء و اللّي كيفي يلزمها حشّه؟ هذا الكل خاطرني عاطيه قدري لروحي؟ هذا الكل خاطرني  محافظه على قيمتي في زمان رخصت فيه أغلب البنات؟

هذا الكل خاطرني كنت ماشيه لحيط لحيط وقلت يزي ما جربت وصدقت.. خليني نريض.. دار فيّ وعليا وما سيب والديّ إلا ما تبليت وحبيتو..

فما مرّه، لعبنا لعبه.. كل مرّه حد يسأل لاخر سألني: ساره تحبني؟ ياخي لتوا يسأل فيا؟ مازال يشك؟ ما كفاتوش لمعة عينيّ ورعشة إيديّ ودقّة قلبي القويّه؟

قتلو أوعدني تصدقني قالي وعد..

قتلو اللّي نعرفو اللّي أنا نفرح معاك ومرتاحه معاك ونكره عركنا ونتمناك ديما معايا.. عندي نار تشعل كي نغـــــير عليك.. هذا يتسمّى حب؟؟ أي حقى نسيت في دمي جاري راك ماك إنت قلتهالي هاذي..

ضحك ضحكه طويله يا ميمتي اَش كنت نعشقها وجاوبني.. يمكن مش حب.. سكت وزدت سألتو إنت تستحق نحس بهذا الكل؟؟

قوي السؤال وضحو شويا باش نعرف فهمتو صحيح ولا لا.. يتبهلل عليا.. وقتها باز حشم وما حبش يزيد يكذب عليا..

مشيتلو بهواه ووضحتلو سؤالي.. اللّي ما نعرش اَش كان فيه صعيب، إنت تستحق نحس على خاطرك هذا الكل ولا لا؟ هههههه في لخر قالي توا نستحق..

صدقتو ومشيت معاه في الخط..

قالي راك كيفي.. راك قطعه منّي.. كان جيت نحكي مع حد اَخر كيفك والله لا يفهم كعبه.. إنت نحسك شويا منّي.. إنت صعيب توا باش ترضى بحد اَخر خاطر اللّي شوفتو معايا ما تلقاهش عند حد اَخر.. خاطر ما فماش كيفي موش فخره أما أذيكا الحقيقه.. الحقيقه اللّي متعبتني و لليوم واجعتني.. ما رضيت بحد.. ما وصلت لقيت حد نرتاحلو.. حد ما يخونش وما يكذبش عليا كيفو.. حد يفهم غزرتي ويحب هبالي.. حد ما نحشمش منّو وما نخممش كي نبدا نحكي معاه سكايب باش نمشي نمشط شعري عادي نخليه داخل بعضو كيما كنت نخرجلك!!

إنت زاده ماكش مش تلقى كيفي.. كيف هبالي وكلامي حتّى سحر ملامي وقدري العالي لا عند هذي لا لخرى لا حتّى اللّي تحكي معاها توا.. و كان إنت حكيت بلا فخره أنا مش نحكي بفخره.. يا ديني خلينا مرّه وحده نكونو مش كيف كيف!!

دارت الأيامات وخيبلي ظنّي قهرني.. وقلبي ليعلي ووجعلي.. عمري ما كنت خايبه معاه.. عشت معاه متمنيه كان رضاه!!

أمّا الله غالب تكتبلنا نتلقاو في غلطه ونبعدو في قالب غلطه أخرى!!

الغريبه اللّي أنا ماني مستغربه من حتّى شيء.. يا راجل راني قاريتك عارفتك وفاهمتك وأكثر من روحك حافظتك..

نعرفك تحب البيضاء والسمراء و المدّينه و اللّي مسيبه شعرها.. أمّا عاد اللّي عندها بوسة خاله حذا فمها يلزم تنحيلها أمّها..

عملنا حساب كل شيء حتّى الفراق واللّي بعد الفراق.. بنينا حمام وجبانه.. زدنا حذاهم جامع ودورناهم بالخْضار وحطينا كلب أبيض يعس باش حد ما يفكلنا بلاصتنا غيرنا هاوكا زاده باش كان حد فينا قتل الاَخر يغسلو ويقرا عليه ويمشي في جنازتو و يقرالو الفاتـــــحه.. هبالنا.. ووتخلويضنا..

أحلى حاجه فينا اللّي أحنا كيف كيف.. من اَك النوع اللّي كي يمشي ويخلي عمرو ما يرجع يهز.. أحنا نحطوا النقطه كان لازم تتحط!! خاطر قلوبنــا ما عنــدهاش كلــمه معــانا!!

يا ليتو من أول مرّه غزّر في عينيّ قالي ماكش ليّا مش يقولي محلاك بين يدّي.. عالأقل رانا بقينا أحباب نهنيو بعضنا في الأعياد.. وكان تلاقينا لا نلومك لا تلوم عليا.. تمنيتك بقيت ذكرى مزيانه حلوه باش حتّى كان فرقتنا الأيامات ويجي إسمك في حديث لا نغمضّ عينيّ لا نسكر وذنّي وإنجم نقول ما تحكيوش عليه أذاكا خويا وعزيز عليّ..

آه تعبـــت..  بنيتلك عش في روحي تمنيتو يعيش مشيت هدمتو بإيديك زايد ماك ساقــط ما تستاهلنيش..

:RQ
القصّه خياليه و لا تمّس لي بأي صلّة في الواقع إذا فلا داعي لكومونتارات فاشلة عيشكم.

بقلم ساره المسعودي