نحب نعرّس يا فاطمة !

قالتها و سكتت شويا كاينّي تثبّت فيا نقولش بوجهي حاجة تخليها توقّف الكلام . تبسمت و ستنيتها تكمّل

نعرف حتى طفلة لا توصل تقلك هكا ديراكت .. الجملة هاذي على بساطتها تنجّم تحسسك انو المرا الي قالتها مرا مش باهية .. مزروبة .. مجبودة من لسانها ...فريفتة .. مش رزينة .. تقول في شي لازمو يتسكت عليه .. ما يلزموش يتقال

اما انا تعبت و نحب نحكي

نحب نعرّس .. الغربة كلاتلي الجواجي متع قلبي .. الوحش .. الاهداف البعاد و القراب الي جيت على خاطرهم .. العمر الي قاعد ينقص بالنهار كي اليومية العربي الي تنتّفلها في وراقها .. .. الخريف .. الشتاء .. شياح الصيف .. صوت تزمير الكراهب في حومة دار بابا .. تصاور قدم مخبين في وسط مخي .. بدني الي تحلّ .. زيني الي بش يبدا يوفى .. نحس في روحي من داخل كبرت ! كي شمعة .. كي فتيلة .. كي دبوزة كولونيا نساوها محلولة

بدّلت البوماضات .. ماعادش حب الشباب مشكلتي .. مشكلتي التكميشات الي بداو يطلّوا عليا في تراكن وجهي .. داير عينيا المحوّق من الدخان من السهرية من قلة النوم من ضغط امي عليا سنين و هي تهرّ

"يا بنيّتي روّح خوذ راجل و هنيني عليك  نحب نرى صغارك"

في الاول كنت نقوللها يا امي المرا مش ماعون يجيب الصغار .. مش ماكينة .. مش البطلة متع مسلسل الولادة و كهاو .. يا امي نحب نوصل نحب نشيخ نحب نتفرهد نحب نسفر .. يا امي ما تلزش عليا يفرّحك .. نحب نجرّب الرجال الاخرين ,  نحب نعيش عيشة القوٍّرة.. ما نحبش نعيش كيفك .. نطيّب و نمسح و نسيّق و نرقد و نربّي الصغار ... انا في وسطي حاجة تقلي الي انا نحب نزيد نطير .. وما نحبّش نركش

كل ماكنت نكلّم امي نهار الاحد بعد الدوش كانت تاكل بعضها بيناتنا .. لين وليت نخيّر ما نكلمهاش .. و من الاحد للاحد وليت نكلمها مريرة في الشهر .. نجاوب فيها على اسئلتها ب اي و لا لا و بأقل كلمة تتقال بش ما نوصلوش نتعاركو ..

توحشت تليفونات امي متع السنين الاولانين .. بديت نحس الي هي كانت تحبني اكثر كي كانت تقلي كيفاش تحبني نعيش .. كي كانت تستناني نكلمها بش تقلي

برا اندب على ايامك اهايكا حى سهير بنت الحماص خذات راجل و جابلها ملاك تكذّب العين و ما رات حتى  من الكاناويطة لونها موالم لفوطة الفضة و التقريطة البيضاء .. و زادها مقياس شيشخان يشعل شعلان

قعدت سنين ربي نقنع في روحي الي ستيل عيشة سهير و غيرها ما يهمنيش و الي انا عندي حكاية في مخي نحب نعملها قبل الشي هذا الكل

واليوم ما نعرش اش جرالي .. مش اليوم بركا لا محالة .. من راس العام و انا هكا

نحب نعرّس .. زعمة من الشتاء ؟ مالطقس المسحّب ؟ من قلة الشمس جرالي هكا ؟ من العمر ؟ مالتكميش الي داير بعينيا ؟ من امي الي ماعادش تعاركني ؟ ستخايلت روحي بش نفرح كي رتحت من تكعرير امي على ماخذة الراجل ..

نحب نعرّس .. نحب عبد يخلصلي تليفون الدار كي نبدا مش فاضية .. و نحب عبد يقلي ما أبن مقرونتك .. و صحة الدوش .. و سمالله عليك كي نمرض .. المرضة الاخرة هدتني .. مش حكاية وحدة اما حسيت الي انا كان نموت و انا هكا مش بش تبكي عليا كان امي و جيرانها .. نحب راجلي يبكي عليا .. و يحس  الي الدنيا بش تاقف بعدي .. نحب يروّح شارب و نتعارك معاه لين نفيّقو الطفل ..

نحب نجيب صغير ! و بوه يتعب معايا و ندوشولو مع بعضنا و يفيقنا من النوم  و نتعاركو على اسمو و لون حوايجو متع العيد

نحب نقلو امك عملتلي و فعلتلي و يقلي وسع بالك معاها انا ما نجمش نوجعها

نحب راجل يعيّد معايا .. صباحات الاعياد هوني و انا وحدي وليت نحسهم حزانى ياسر .. وليت نسمع الوقت يبكي معايا ..

انا من كثر ماني نحب نعرّس و ليت نحس الي الراجل الي بش ناخذو هو سوبرمان بيدو .. ينجم يطلّع تلاثة دبابز غاز فرد وقت .. و ينجم يجيبلي الدواء و يتلهى بيا و يطيب العشاء و يغسلي الصابون و انا مريضة... الكل مع بعضهم ..

وليت نتصورو وحدو قادر بش يقتل الكساد متع الاحد العشية ..

ونعرف الي مش صحيح اما هاذاكا هو الفقد اش يخلّف

كل أحد نخمم نكلم امي نقوللها شحوال سهير بنت الحماص ؟ شبيك يا امي ماعادش تقلي خوذ راجل يزي من القراية و الخدمة ؟ خممت نقول لامي يا امي شبيك ماعادش تسطرلي حياتي كي قبل ؟ خفت تحسني رخّيت و تشمت فيا و لا تتحيّر عليا و لا تعملي درس في الارشاد كي كل مرة .. نجي بش نتكلم و نفرّغ قلبي نسكت

الصباح كلمتني امي على غير العادة قتلي عمتك توفات !

عمتي ؟ الي ما تجيناش و ما تنشدش علينا و ما نراوهاش جملة ؟ ربي يرحمها .. بربي يا امي خليني في همي ... و علقت التليفون ..

اول ما جات عيني قدام المراية زعقت بالبكاء

تفكرت أكثر حاجة محسستني الي انا نحب نعرّس ..

نحب راجل يصبرني على موت امي بعد عمر طويل .. كان امي تجرالها حاجة و انا هكا وحدي شكون بيا ؟ كان نهستر ؟ كان ندوخ ؟ كان ندبرم ؟ شكون بش يهزني من يدي و يقومني مرة اخرى للدنيا .. شكون بخلاف راجلي ؟

هوني في بلاد الغربة لا الصحاب تلقاهم و تعملّ عليهم و لا  فما عايلة تحميك من غدر الزمان .. هوني . كيما قالت صليحة في الغربة فناني عمري ضاع

امكانية اني نعرّس هوني تساوي الصفر فاصل و يمكن اقل .. منين بش نجيبو انا الراجل هوني ؟ بش تراني امو في الحمام ؟ بش نقوم نشطح في حنة صوفي صاحبتي بش تقمّرني خالتو و تكلمو عليا ؟ بش نتعرّف عليه في سيت حاطط اعلان يشعل و يطفى من لوطا ترغبين في رجال مسلمين ؟

مسلمين ؟ مسيحيين ؟ ملحدين ؟ بوذيين ؟ عبدة بقر ؟

نحب راجل .. يتلهى بيا و يجيب الخضرة و الغلّة و يغطيني كي نتعرّى في الليل و يقعد يكعرر كي يلقى سواريه مش محددة ... نحب راجل يلوّح كرافاتاتو في التراكن الكل و نكلمو و هو في القهوة  يعلّق عليا ..  و يغطيني في الليل كي نبرد .. و يغير من صحابي الاولاد و يعرف يسرق الورد من جناين العباد و يرشقهولي على راسي ..

نحب راجل يعرف يهز عليا الشي الي عندي سنين نعمل فيه منا و منا وحدي ..

نحب نقسم الادوار

نحب نعرّس و نحب العباد تفك على قتلي من المرج متع وقتاش نفرحو بيك خاطر انا بيدي مستنية نفرح و ما نحب حد يفكرني ..

الي يحبوني نفرح ما هوما بيدهم الي ما يحبونيش نقول نحب نفرح .. بش ما نظهرش فريفطة

نحب نعرّس

شكون قال الي هاذي جملة محضورة ما تتقالش ؟. ياخي علاه علاه ؟ هاو يقولو العباد احنا بردانين و احنا حيعانين و احنا نحبو نتغطاو ؟

انا نهارت الي نشدت مماتي يرحمها قتلها علاه العباد يعملو القاوق هاكا الكل للعرس .. جبدتني من وذني وقاتلي تقعد عمرك الكل مهبولة و بهلولة .. حسب رايك علاش ؟ خاطر بش يوليو يعيشومع بعضهم ؟ تي ماي ظاهرة ..

اي مالا هاو يحتفلو بيه بالذبيحة و التغريد و الحناني و السخط على قبهم .. و الي تعمل هكا تجي بش تعرّس تولي تتحوشم و هي مصدرة و يوصيوها بش من غدوة ما تحكي شي و تولي فجأة من الي كانت تلعب معاك في الروندا ولت البارح .. تصبح مرا  جاية من كوكب اخر .. بين عشية و ضحاها انت تكلمها و هي تقلّك تي يزي نحشم  

يزيو انتوما مالا .. يزيو من التمسكية .. يزيو من الكذب .. يزيو من تسمية الحاجات بزوز تلاثة اسامي .. يزيو من الحكم عالعباد بجرد جمل بسيطة يقولوها وقتلي يحسوها  ماعادش تلومو عليا كي نقول نحب نعرس !

انا الي عديت عمري نجري بش ما نشبهش أمي .. قادرة اليوم نعطي عمري و نشبهلها

بقلم فاطمة الشريف