قتلك الي انت ساعات تحسسني بنقص ... تحيرني في امري و تخليني كالمهبولة نسأل و نجواب وحدي، كي زربوط ندور في بلاصتي ... نحس الي انا مقصرة معاك ولا بالكشي انت عينيك فارغة و عمرها ما تتملى ...

نشعلك صوابعي شمع و انت تزيد تشعل فيا نار بش تراني نتحرق، تقولشي عليك تتبنن في عذابي ... نبدا نخمم و نكمبس كيفاه نزهيك و نرا لمعة في عينيك، نبدا طامعة في كلمة حلوة بش تقولهالي ... تقولشي نتسول منك فالمحبة، طرف مودة، جواب نخبيه تحت المخدة، بوسة و تعنيقة نتفكرهم وقت الشدة ، ميسالش اعتبرهم صدقة جارية ...

نعرفك حنين، اما ساعات نستغرب في امرك، نقول هالقسوة تجيب فيها منين ولا يمكن متحبنيش اكا الحب العظيم، الي يهد سور برلين كان جا موجود، الي كان تبدا في صين تشق على خاطرو البحور والبرور ... يمكن، يمكن مزلت متربعتش في قلبك كيما انت ملكت قلبي ... منيش نلوم عليك، نعرف المحبة معندناش فيها إيد ... يمكن انا جيت في وقت مش صحيح، جيت مخر، جيت بعد ما قتلو فيك الثيقة و خلاولك الكبيدة مشوية ... يمكن زادا انا نتخيل و شئ ملي حكيتوا ماهو موجود ...

اما انا قلبي عليك ملهوف، كي تبعد نموت بالخوف، بعد ما مات و انت رجعت فيه الروح، كان تمشي شكون يحس بيه و يروف ... عايشة معاك في خوف، نهار بارد و ما على بالك بيا و نهار تقلب دنيا عليا ... بعيد، طفي ضوء عليا و كي نبدا حذاك تبدا نار ڨايدة ...

معرفتش نشدك مانا ثنية، اما والله و غلاوتك و جاه للاَّ منوبية، الخوف مكبلني و كل ليلة يكبر فيا، كل ليلة ياكلي مخي بافكارو الدونية .. كان تطلع متحبنيش وانا نفحة و تطوى الصفحة و نولي انا المنسية .. كان تمشي و تخليني بعد ما قلبي حيى فيا .. انت بطبيعتك ماشي، هذا حلمك حتى قبل ما تتعرف عليا، اما كان تمشي و تنساني و معادش نعرف لك ثنية .. ترَسيلي نعاود من جديد، كيفاه بش ننساك، اصلا منحبش ننساك، منحبش نعاود من جديد، نفسر و نلوج .. وهو قلبي بش يروم الغيرك يا ذنوبي، عينيا مينجمش يملاها غيرك، اياماتي معاك والعرك و السب و الصياح، الملامة و البكاء و البوس و التحويس و التصوير و الغيرة و الفرحة و التفدليك الي كاينّو بين أصحاب، مزال بش تبقالي متعة نعمل هذا الكل مع غيرك، اصلا منحبش، لا لا منحبش حتى نخمم فالحكاية .. تهلويس و كوابيس عبثت بحالي و ب لياليّا. هنيّني، طمني و قلي الي انت ليا، قلي الي مهما تبعد بش ترجع فيا ..

تعبت وانا نحاول نفهم في محبتك ليا