كل يوم نتوحشك ... نلوج عليك ... في خيالي .... نلقاك تصويرة مضببة ...نبكي ..... نتعب ... و ننسى (هو الحق عمري ما ننسى اما نقنع روحي اني نسيت ) ... و نعااود نتوحشك و نلوج عليك نلقاك تصويرة مضببة و نبكي و نتعب و ننسى ... نرقد و نقوم و انا نخمم فيك ... في كلامنا ...في حبنا اللي ضاع ... في سهرياتنا ... في ملامنا ... في هبالنا ... نخمم في اللمعة اللي في عينك كيف تقلي نحبك .. في تبسيمتك كيف خدودي يحمارو و نحشم منك ... في حنيتك كيف تبوسلي يدي ... في ريحتك كي تعنقني... في عينيك كي تغير عليا ... و كي تقحرلي ااك القحرة الحنينة..

نتفكر كلامك الحلو .. نتفكر كلمة مرتي صغرونتي .. نتفكر هبالنا و ضحكناا و تنبيرنا عالعباد .. وينو هذا الكل .. وينو كلامك ؟ وينو ملامك ؟ ويني حنيتك ؟ ويني غيرتك؟ وينك انت؟؟؟ .. مشيت و هزيت معاك كل شي حلو في حياتي ... هزيت معاك فرحتي ... خليتلي كان الوجيعة ... كنت انت الشمس اللي مضويتلي حياتي ...  بعدك ولبت عايشة على ضوء الشمووع ... اما اليوم حتى شمووعي ذاابوو...  اليوم بقالي كان الظلام .... اليوم نرجع نتوحشك و نلوج عليك نلقاك تصويرة مضببة  نبكي و نحاول ننسى .... حتى يجي نهار ماعادش نتوحشك ... و لا نلوج و لا عاد نبكي .... وقتها نكون انا في قبري و انت تبكي علياا !